پی ایس ایل ‘لاہور قلندرز‘اسلام آباد یونائٹیڈ آج مدمقابل ہونگے 

لاہور(سپوٹس رپورٹر) پاکستان سپر لیگ 10میں آج ایک میچ کھیلا جائے گا۔ لاہور قلندرز اور اسلام آباد یونائٹیڈ کی ٹیمیں رات 8بجے قذافی سٹیڈیم میں مد مقابل ہونگی ۔ کل یکم مئی کو دو میچ ہونگے ۔ پہلا میچ کراچی کنگز اور ملتان سلطانز کے درمیان دن ساڑھے تین بجے قذافی سٹیڈیم میں کھیلاجائیگا۔ دوسرے میچ میں لاہور قلندرز اور کوئٹہ گلیڈی ایٹرز کی ٹیمیں رات8بجے قذافی سٹیڈیم میں مد مقابل ہونگی ۔  لاہور قلندر کے آل راؤنڈر سکندر رضا نے کہاہے کہ ایک ہی کھلاڑی سب میچ نہیں جتواتا، ٹاپ آرڈر آؤٹ ہوگا تو ہماری باری آئیگی۔ لاہور قلندرز کے ٹاپ آرڈر کو تھوڑا زیادہ تنقید کا نشانہ بنایا جا رہا ہے۔ کھلاڑیوں کو تھوڑا وقت چاہیے، ہم نعیم کو بیک کر رہے ہیں، ٹاپ آرڈر میں فخر زمان فخر ہیں، وہ ہر سال رنز کرتے ہیں۔ کرکٹ ٹیم گیم ہے ہر کسی کو اپنا حصہ ڈالنا ہوتا ہے۔ لاہور میں نیا بال کھیلنا تھوڑا مشکل ہو رہا ہے، پاور پلے میں 40 رنز پر کوئی آئوٹ نہ ہو تو یہ بھی ٹھیک ہے۔ میں نہیں سمجھتا کہ لاہور قلندرز کا ابھی مومینٹم بنا ہے، ابھی ہم مزید بہتر کرسکتے ہیں، ابھی ہم 100 فیصد نہیں دے پا رہے۔