پاکستان کپ میں شائقین کی عدم دلچسپی حفیظ نے مفت داخلے کا مطالبہ کر دیا
لاہور(آئی این پی) پاکستان ون ڈے کپ ٹورنامنٹ میں شائقین کی عدم دلچسپی نے محمد حفیظ کو بھی افسردہ کر دیا، خیبرپختونخوا کے کپتان نے پی سی بی سے سٹیڈیم میں شائقین کی فری انٹری کی اپیل کر دی۔اسٹار کرکٹر نے سوشل میڈیا کا سہارا لیتے ہوئے اپنے دکھ کو ان الفاظ میں بیان کیا کہ فیصل آباد میں جاری پاکستان کپ کے دوران اسٹیڈیم میں شائقین کی بہت کم تعداد دیکھ کر حیرانی ہو رہی ہے، پی سی بی سے عاجزانہ اپیل ہے کہ شائقین کو اسٹیڈیم میں فری داخلے کی اجازت دے تاکہ وہ براہ راست میچز سے لطف اندوز ہو سکیں۔شاہد آفریدی کے ایک مداح نے اس پر تبصرہ کرتے ہوئے لکھا حفیظ بھائی! ایک دن لالہ کو اسٹیڈیم میں لا کر بٹھا، یقین مانئے آپ پی سی بی کو بھول جائیں گے۔ ایک اور صارف نے کہا کہ آپ ٹھیک کہہ رہے ہیں، ایسے لگتا ہے کہ پرانے دور کا میچ لگا ہوا ہے، گرانڈز کی حالت ابتر ہے، میدانوں پر کیوں پیسے نہیں لگاتے، اتنا بجٹ کہاں جاتا ہے۔واضح رہے کہ پاکستان کی ڈومیسٹک کرکٹ کے سب سے بڑے ایونٹ کی مناسب تشہیر اور پبلسٹی نہیں کی گئی اور ٹکٹوں کی قیمت اگرچہ معمولی رکھی گئی تاہم افتتاحی میچ میں بھی شائقین کی تعداد نہ ہونے کے برابر رہی جس کے بعد بھی شائقین کی بہت کم تعداد اسٹیڈیم کا رخ کر رہی ہے۔