عسکری ادارے کی قیادت پر الزام تراشی آئی ایس پی آر کی جامع وضاحت
پاک افواج کے شعبہ تعلقات عامہ (آئی ایس پی آر) نے آرمی چیف جنرل قمر جاوید باجوہ کیخلاف اور انکی فیملی کے اثاثوں سے متعلق سوشل میڈیا پر مذموم مہم کو حقائق کے منافی‘ کھلا جھوٹ اور بدنیتی پر مبنی قرار دیتے ہوئے کہا ہے کہ گمراہ کن اعداد و شمار مفروضوں کی بنیاد پر بڑھا چڑھا کر پیش کئے گئے ہیں۔ ایک خاص گروپ نے نہایت چالاکی و بددیانتی کے ساتھ جنرل باجوہ کی بہو کے والد (سمدھی) اور فیملی کے اثاثوں کو آرمی چیف اور انکے خاندان سے منسوب کیا ہے۔ یہ سراسر غلط تاثر دیا جارہا ہے کہ یہ اثاثے آرمی چیف جنرل باجوہ کے چھ سالہ دور میں انکے سمدھی نے بنائے۔ آرمی چیف جنرل قمر جاوید باجوہ‘ انکی اہلیہ اور خاندان کا ہر اثاثہ ایف بی آر میں باقاعدہ ڈکلیئرڈ ہے۔
ملک کے دفاعی ادارے اوراسکی قیادت کیخلاف ہرزہ سرائی یا الزام تراشی نہ صرف قومی جرم ہے بلکہ ملک کی سلامتی کو خطرے میں ڈالنے کے بھی مترادف ہے۔ نتائج کی پرواہ کئے بغیر ملک دشمن عناصر کی طرف سے سوشل میڈیا پر آرمی چیف جنرل قمر جاوید باجوہ اور انکی فیملی سے متعلق مذموم مہم شروع کی گئی جو ایک مخصوص ایجنڈے کے تحت اس پورے ادارے کی ساکھ اور اسکے وقار کو مجروح کرنے کی کوشش نظر آرہی ہے۔ اس وقت ملک میں سیاسی انتشار عروج پر ہے‘ مخالفین پوائنٹ سکورنگ کرکے ایک دوسرے پر سبقت حاصل کرنے کی کوشش کر رہے ہیں جس کا فائدہ ملک دشمن عناصر کھل کر اٹھا رہے ہیں۔ اس لئے اس مذموم مہم کے پس پردہ محرکات کا فوری کھوج لگا کر اس کا حصہ بننے والے عناصر کو کیفر کردار تک پہنچانے کی اشد ضرورت ہے۔کسی بھی ادارے کے سربراہ یا اسکے اہلکار کی کرپشن کے حوالے سے نوٹس لینا متعلقہ اتھارٹی کا کام ہے۔ پاک فوج کا احتساب کا اپنا نظام ہے جس میں کسی بھی الزام اور جرم پر متعلقہ افسر و اہلکار کا کڑا محاسبہ ہوتا ہے۔ ڈی جی آئی ایس پی آر نے جس مخصوص گروپ کی طرف اشارہ کیا ہے‘ اسے بھی منظر عام پر لانا چاہیے اور اسکی طرف سے کی گئی الزام تراشی کا سخت نوٹس لینا چاہیے۔ عسکری ادارے کیخلاف اس مہم کے پیچھے بیرونی ہاتھ بالخصوص بھارت کے ملوث ہونے کو ہرگز نظرانداز نہیں کیا جا سکتا کیونکہ وہ پاکستان کی سلامتی کو نقصان پہنچانے کا کوئی موقع ہاتھ سے نہیں جانے دیتا۔ سائبر کرائم کنٹرول یونٹ کو بھی سوشل میڈیا پر جاری قومی ادارے کیخلاف مہم کو روکنے میں اپنا مؤثر کردار ادا کرنا چاہیے۔ جغرافیائی سرحدوں کی حفاظت کرنے‘ بھارت کے جارحانہ عزائم خاک میں ملانے اور بیرونی مداخلت سے ہونیوالی ملک میں دہشت گردی سے نمٹنے میں پاک فوج اپنا پیشہ ورانہ کردار ایمانداری سے ادا کر رہی ہے اور اس کیلئے اپنی جانوں کے نذرانے پیش کرنے سے بھی دریغ نہیں کررہی۔ اپنے مذموم مقاصد کے حصول کیلئے عسکری ادارے اور اسکی قیادت پر جھوٹے اور بے بنیاد الزامات لگا نے والے ان قومی مجرموں کو بہرصورت کیفر کردار کو پہنچانے کی ضرورت ہے۔