ضلع میانوالی میں ڈسٹرکٹ پبلک سکول قائم کریں
مکرمی!صوبہ پنجاب کے 35 اضلاع میں ڈسٹرکٹ پبلک سکول قائم ہیں جہاں سے ان اضلاع کے بچے معیاری اور سستی تعلیم حاصل کر رہے ہیں لیکن ضلع میانوالی میں ڈسٹرکٹ پبلک سکول کا قیام آج تک عمل میں نہیں لایا گیا۔ ڈی پی ایس کا کنٹرول ڈپٹی کمشنر متعلقہ کے پاس ہوتا ہے جس کی وجہ سے ڈی پی ایس کا معیار اور کنٹرول مثالی ہوتاہے۔ ضلع میانوالی میں ڈسٹرکٹ پبلک سکول کے قیام کے لیے سال 2012ء سے متعدد بار روزنامہ نوائے وقت لاہور میں ایڈیٹر کی ڈاک میں راقم کے مراسلے شائع ہو چکے ہیں اور سابقہ ڈپٹی کمشنروں کی خدمت میں مراسلہ جات کی فوٹو کاپیاں اور تفصیلی درخواستیں ارسال کی جاتی رہی ہیں لیکن آج تک اس اہم تعلیمی ادارہ کے اجراء کے متعلق کوئی پیش رفت نہیں ہوئی۔ ڈپٹی کمشنر میانوالی کی خدمت میں اپیل ہے کہ وہ ڈسٹرکٹ پبلک سکول میانوالی کا فوری اجراء کریں اور ضلع میانوالی کے ہزاروں طلباء اور ان کے والدین کی دعائیں لیں۔ امید ہے ڈپٹی کمشنر میانوالی ذاتی دلچسپی لیتے ہوئے علم دوستی کا ثبوت دیں گے اور صوبہ کے دیگر اضلع کی طرح وزیراعظم عمران خان کے ضلع میانوالی میں ڈسٹرکٹ پبلک سکول کا قیام عمل میں لائیں گے اور اس کے اجراء میں حائل رکاوٹوں کو دور کرکے اسے فنکشنل کریں گے۔
