مہنگائی کا جن عام آدمی کیلئے خوفناک شکل بنائے کھڑا ہے:لیاقت بلوچ

لاہور (خصوصی نامہ نگار)نائب امیر جماعت اسلامی، سیکرٹری جنرل ملی یکجہتی کونسل لیاقت بلوچ نے یوم القدس سیمینار، مصطفی میرانی کی جانب سے افطار ڈنر پروگرام سے خطاب کرتے ہوئے کہا ماہِ رمضان میں روزہ، تلاوتِ قرآن، عبادات اور اعتکاف کی عظیم برکات کیساتھ پاکستان کے عوام کو بدامنی، دہشت گردی، بیگناہ انسانوں کے قتل کے بڑے سانحات کا سامنا رہا۔ عام آدمی کیلئے مہنگائی کا جن خوفناک شکل بنائے کھڑا ہے۔ فلسطینیوں پر اسرائیلی صیہونی بمباری، انسانوں کا قتل عام اور مقبوضہ کشمیر میں قابض بھارتی فوج کے ظلم و ستم ملت اسلامیہ کیلئے بڑا المیہ بنے ہوئے ہیں۔ اتحادِ اْمت، قرآن و سنت کی بالادستی، عدل و انصاف کے ذریعے ہی ہر مسلم ملک بحرانوں سے نجات پاسکتا ہے۔