طویل خشک سالی کا شکار جزیرہ نما ملک مڈغاسکر سب سے زیادہ متاثر ہوا ہے، جہاں کم از کم 47 اموات اور ایک لاکھ 10 ہزار سے زائد متاثر، موزمبیق میں 17 افراد ہلاک اور 45 ہزار سے زائد متاثر، جبکہ ملاوی میں 16 اموات اور تقریباً دو لاکھ 17 ہزار لوگ متاثر ہوئے ہیں‘ یورپی سول پروٹیکشن اینڈ ہیومینٹیرین ایڈ آپریشنز کی رپورٹ
افریقی ممالک میں آنے والے طوفان کے باعث اب تک 86 سے زائد افراد ہلاک، جبکہ لاکھوں افراد متاثر ہوچکے ہیں۔ یورپی کمیشن کی انسانی ہمدردی کی ایجنسی یورپی سول پروٹیکشن اینڈ ہیومینٹیرین ایڈ آپریشنز (ECHO) نے افریقی ساحلی ممالک میں طوفان اینا کے باعث آنے والی تباہی سے متعلق رپورٹ جاری کردی ہے۔رپورٹ کے مطابق طویل خشک سالی کا شکار جزیرہ نما ملک مڈغاسکر سب سے زیادہ متاثر ہوا ہے، جہاں کم از کم 47 اموات اور ایک لاکھ 10 ہزار سے زائد متاثر، موزمبیق میں 17 افراد ہلاک اور 45 ہزار سے زائد متاثر، جبکہ ملاوی میں 16 اموات اور تقریباً دو لاکھ 17 ہزار لوگ متاثر ہوئے ہیں۔ مجموعی طور پر اب تک 86 سے زائد افراد ہلاک ہوچکے ہیں۔رپورٹ میں بتایا گیا کہ شدید بارشوں کے باعث ندیاں بہہ گئی اور سیلاب اور لینڈ سلائیڈنگ اموات اور جانی نقصان کا سبب بنا۔دوسری طرف موسمیاتی ادارے بتاتے ہیں کہ طوفان اینا اگرچہ کمزور ہوچکا ہے، تاہم اب بھی ملاوی اور زیمبیا میں ہفتے کے آخر میں مزید تیز بارش ہو سکتی ہے۔ورلڈ فوڈ پروگرام کے ایک ترجمان نے بتایا کہ سیلاب کے باعث زرعی اراضی، اہم انفراسٹرکچر اور مکانات کو نقصان پہنچا ہے، جب کہ جانیں اور ذریعہ معاش ضائع ہوا ہے۔ترجمان کا کہنا تھا کہ جنوبی افریقی ممالک حالیہ برسوں میں شدید طوفانوں اور طوفانوں سے بار بار متاثر ہوئے ہیں، جنہوں نے خوراک کو محفوظ کرنے کا سسٹم تباہ کیا ہے، ذریعہ معاش ختم اور بڑی تعداد میں لوگوں کو بے گھر کیا ہے۔
