شمالی چھاؤنی‘ کیولری گراؤنڈ سمیت کئی علاقوں میں ڈاکے‘ گاڑیاں‘ موٹر سائیکلیں چوری

لاہور (نامہ نگار) ڈاکوؤں اور چوروں نے شہریوں سے لاکھوں روپے مالیت کی نقدی، طلائی زیورات، موبائل فون، موٹر سائیکلیں، گاڑیاں اور دیگر سامان لوٹ لیا۔ تفصیلات کے مطابق ڈاکوؤں نے مغلپورہ کے علاقے میں تصدق کے گھر گھس کر اہلخانہ کو یرغمال بنا کر 5 لاکھ20 ہزار روپے مالیت کی نقدی، موبائل فون، طلائی زیورات اور دیگر سامان، اچھرہ کے علاقے میں عادل اور اس کی فیملی سے 3لاکھ 65ہزار روپے مالیت کی نقدی، زیورات اور موبائل فون، شمالی چھاؤنی کے علاقے میں خالد سے 3لاکھ 6 ہزار روپے نقدی اور موبائل فون، مزنگ کے علاقے میں فہد سے 2لاکھ 2ہزار روپے نقدی اور موبائل فون، شفیق آباد کے علاقے میں منیر سے 2 لاکھ روپے نقدی اور موبائل فون، کیولری گراؤنڈ کے علاقے میں ارشاد کو یرغمال بنا کر موبائل فون اور ایک لاکھ روپے، شفیق آباد کے علاقے میں حارث سے 98ہزار روپے نقدی اور موبائل فون، شالیمارکے علاقے میں شاہد سے 80 ہزار روپے اور موبائل فون، مانگا منڈی کے علاقے میں ندرت سے50 ہزار روپے اور موبائل فون، نصراللہ  سے 6 ہزار روپے اور موبائل فون لوٹ لیا۔ چوروں نے گلبرگ، جنوبی چھاؤنی اور قلعہ گجر سنگھ کے علاقوں سے3گاڑیاں، سندر کے علاقے سے رکشہ جبکہ اسلام پورہ، وحدت کالونی، سبزہ زار، جوہر ٹاؤن، لیاقت آباد، باغبانپورہ اور ہربنس پورہ کے علاقوں میں سے 7موٹر سائیکلیں چوری کر لیں۔