ایس او پیز پر عمل جاری رکھا تو کورونا بحران سے نکل جائیں گے: وزیر اعظم
اسلام آباد: وزیر اعظم عمران خان نے کہا ہے کہ ایس او پیز پر عمل جاری رکھا تو کورونا بحران سے نکل جائیں گے۔
وزیر اعظم عمران خان نے سماجی رابطے کی ویب سائٹ ٹوئٹر پر لکھا کہ میری ٹیم اسمارٹ لاک ڈاوَن نافذ کرنے والے پہلے لوگوں میں شامل تھی۔
انہوں نے کہا کہ مجھے فخر ہے میری ٹیم نے کورونا بحران میں میری مدد کی اور اگر ایس او پیز پر عمل جاری رکھا تو کورونا بحران سے نکل جائیں گے۔
واضح رہے کہ پاکستان میں گزشتہ 24 گھنٹوں کے دوران کورونا کے سبب مزید 83 اموات رپورٹ ہوئیں جس کے بعد اموات کی مجموعی تعداد 4 ہزار 118 ہو گئی ہے۔
ملک بھر سے کورونا وائرس کے مزید 4 ہزار 72 کیسز رپورٹ ہوئے جس کے بعد متاثرہ افراد کی تعداد 2 لاکھ 2 ہزار 955 ہو گئی۔
نیشنل کمانڈ اینڈ آپریشن سنٹر کی جانب سے جاری کیے گئے اعدادوشمار کے مطابق ملک بھر میں کورونا سے متاثرہ 86 ہزار 906 مریض صحت یاب ہو گئے۔
دو روز قبل وزیر اعظم نے آزاد کشمیر میں تقریب سے خطاب کرتے ہوئے 5 اگست سے قبل دنیا بھر میں مقبوضہ کشمیر کے لیے تحریک چلانے کا اعلان کرتے ہوئے کہا کہ مودی حکومت مقبوضہ کشمیر میں سوچی سمجھی سازش کے تحت ظلم کر رہی ہے۔
