خیبرپختونخوا میں تیزی سے اومیکرون کے وار جاری،مزید 15 نئے کیس رپورٹ

خیبرپختونخوا میں تیزی سے اومیکرون کے وار جاری ہیں۔محکمہ صحت کی جاری کردہ نئی رپورٹ کے مطابق خیبرپختونخوا سے اومیکرون کے مزید 15 نئے کیس رپورٹ ہوئے ہیں۔محکمہ صحت کے مطابق پشاور سے 5 جبکہ 9 اومیکرون کے کیس مردان سے اور ایک لوئر دیر سے رپورٹ ہوا۔ اومیکرون وائرس سے متاثرہ افراد میں 10 مرد جبکہ 5 خواتین شامل ہیں۔دوسری جانب ترجمان صوبائی حکومت بیرسٹر سیف نے صوبے میں لاک ڈاؤن کا امکان مسترد کرتے ہوئے کہا ہے کہ صورتحال ایسی نہیں ہے کہ بڑے پیمانے پرپابندیاں عائد کی جائیں ۔صوبائی حکومت اقدامات کررہی ہے لیکن مجموعی طورپر صوبے بھر میں لاک ڈاؤن نافذ کرنے کا ارادہ نہیں ہے ۔انہوں نے عوام سے اپیل کی کہ احتیاط کریں اوربوسٹر ڈوز لگوائیں۔ بیرسٹر محمد سیف نے کہا کہ اومیکرون ویرینٹ تیزی سے پھیل رہا ہے اور ڈپٹی کمشنر کے اختیارات ہیں کہ جہاں بھی 10 فیصد سے زائد کیس ہوں وہاں لاک ڈائون نافذ کر دے۔محکمہ صحت کے مطابق پشاور اور کوہاٹ میں 24 گھنٹوں میں کورونا کیسوں کی شرح 30 فیصد ریکارڈ کی گئی جبکہ مردان میں 23 اورنوشہرہ میں شرح 17 فیصد رہی۔