بھارت کو یومِ جمہوریہ منانے کا حق نہیں
26 جنوری کو بھارت نے اپنا یوم جمہوریت کچھ اس انداز میں منایا کہ پہلی مرتبہ خود بھارت والوں کو افسوس ہوا ہو گا نئی دہلی جو بھارت کی راجدھانی ہے وہاں کڑے فوج پہرے میں یوم جمہوریہ کی فوجی پریڈ ہوئی اور پہلی مرتبہ اس میں کوئی غیر ملکی سربراہ حکومت بطور مہمان مدعو نہیں تھا۔ سکھوں کی دھمکیوں کی وجہ سے پورا دہلی ایک محصور کرفیو زدہ حالات میں تھا۔ کسی سکھ یا مسلمان کو یوم آزادی کی تقریب کی جگہ لال قلعہ کے قریب پھٹکنے کی اجازت نہیں تھی۔ یوں ایک سہمے سہمے ماحول میں یہ تقریب منعقد ہوئی جس میں وزیر اعظم نریندر مودی نے خطاب کیا۔ مگر وہ بات کہاں مولوی مدن جیسی وہ کرود فردہ اکڑ فوں ۔ وہ میزائلوں، ٹینکوں اور طیاروں کے علاوہ جدید ایٹمی اسلحہ کی نمائش بھی خوف کے تاثر کو زائل نہ کر سکی۔
’’سیون سسٹرز‘‘ سات بہنیں کہلانے والی مغربی بنگال کے اردگرد کی ریاستوں میزورام، ناگا لینڈ ،تری پورہ ، آسام، اروناچل پردیش، جھاڑ کھنڈ ، اڑیسہ اور چھتیس گڑھ میں بھی یہ تقریب خود شرمندہ اور بجھی بجھی سی تھی کیونکہ اس نام نہاد یوم جمہوریہ منانے میں وہاں کے عوام کو کوئی دلچسپی نہیں تھی۔ ان علاقوں کے عوام کو بھارت نے طاقت کے زور پر اپنے ساتھ ملایا ہے۔ یہ تمام علاقے یا صوبے بھارت سے علیحدگی چاہتے ہیں وہاں مسلح تحریک آزادی جاری ہے۔ یہاں روزانہ بھارتی فوج کے ساتھ جھڑپ اور فوجیوں پر حملے ہوتے رہتے ہیں۔
اس کے علاوہ مشرقی پنجاب میں بھی جہاں سکھوں کی کسان تحریک کے بعد حالات بھارتی حکمرانوں کے قابو سے باہر ہوتے جا رہے ہیں خالصتان تحریک پھر سر اٹھاتی نظر آ رہی ہے۔ وہاں بھی بھارتی یوم جمہوریہ نہ وہ موج میلہ تھا نہ رنگا رنگی جو پنجاب کا پنجابیوں کا خاصہ ہوا کرتی تھی۔ ہر طرف ایک خوف تھا۔ دنیا بھر میں جہاں جہاں سکھ اور خالصتان کے حامی رہتے ہیں یہ دن کشمیریوں کی طرح یوم سیاہ کے طور پر منایا۔سب سے بری حالت ریاست جموں و کشمیر میں نظر آئی جسے دو سال قبل بھارت نے اپنے اندر بزور طاقت ضم کرتے ہوئے اعلان کیا تھاکہ اب کشمیر اور کشمیریوں کے دن پھریں گے یہاں خوشحالی اور امن کا دور لوٹ آئے گا مگر دنیا دیکھ رہی ہے کہ دو سالوں میں سب سے زیادہ قتل غارت اور مظلوم و محکوم کشمیریوں کا لہو بہایا گیا۔ بھارت نے راتوں رات 2 سال قبل کشمیر میں 7 لاکھ سے اپنی فوج کی تعداد بڑھا کر 9 لاکھ کر دی جو ہر دس کشمیری پر ایک فوجی تعینات کر دیا۔ تاکہ کشمیری ڈر جائیں اور ہمت ہار بیٹھیں مگر دنیا گواہ ہے کہ کشمیریوں نے بھارت سے علیحدگی کی تحریک کو اسی شدت سے جاری رکھا جیسی وہ 1947ء سے جاری تھی اور 1989ء میں اسے نئی زندگی ملی تھی۔ روزانہ 3 تار 4 کشمیریوں کو بھارتی فوج مجاہد علیحدگی پسند قرار دے کر شہید کررہی ہے۔ گرفتار کرکے دوردراز بھارتی جیلوں میں ٹھونس رہی ہے۔ حریت کانفرنس کی تمام قیادت پابند سلاسل ہے مگر اس کے باوجود تحریک آزادی اسی زور و شور سے جاری ہے۔
گزشتہ روز بھی کشمیر میں تعینات بھارتی آرمی چیف نے وہی پرانا بیان دہرایا کہ 350 سے لے کر 550 تک مسلح علیحدگی پسند جموں کشمیر میں دراندازی کے لیے سرحدوں پر تیار بیٹھے ہیں۔ یہ پرانا گھسا پٹا بیان وہ ہر برس جاری کرتے ہیں اگر ایسا ہے تو پھر یہ 3 سو یا 4 سو علیحدگی پسند ختم کیوں نہیں ہوتے جبکہ ہر سال سینکڑوں کشمیری شہید کئے جا رہے ہیں۔ اس برس بھی 26 جنوری سے دو ہفتے قبل ہی پوری ریاست میں زبردست ناکہ بندی کر کے محاصرے اورتلاشیوں کا بدترین سلسلہ شروع کیا گیا ہر گلی ہر سڑک پر فوجی ناکہ لگا کر کشمیریوں کی تلاشیاں لیتے رہے ۔ اس کے باوجود 26 جنوری کو حریت کانفرنس کی اپیل پرپوری ریاست مقبوضہ کشمیر میں ہڑتال رہی۔ ایک بھی غیرت مند کشمیری کسی سرکاری تقریب میں شریک نہیں تھا۔ سوائے چند مٹھی بھر سرکاری افسران اور بی جے پی کے ٹکڑوں پر پلنے والے افراد کے۔
یوں ہمیشہ کی طرح نہایت خوف کے عالم میں چند درجن افراد نے سرینگر میں منعقدہ یوم جمہوریہ کی پریڈ میں شرکت کی ۔اس تقریب کے علاوہ ایک مضحکہ خیز صورتحال لال چوک سرینگر میں دیکھنے میں ملی۔ جہاں 73 برسوں سے بھارت کو حسرت رہی ہے کہ اپنا ترنگا لہرائے مگر ایسا نہ کر سکی اس بار کرین لفٹر کے ذریعہ دو آدمی اوپر بلند ہوئے اور جاکر گھنٹہ گھر لال چوک کی چوٹی پر پرچم باندھا مگر افسوس وہ بھی شرم کے مارے لٹکا رہا لہرا نہ سکا اور افراتفری میں چند سکولوں کے بچوں اور آرمی والوں نے سڑک پر پانچ چھ پرچم لہرا کر اپنا شوق پورا کیا مگر آدھے گھنٹے بعد جب یہ سب چلے گئے تو جھنڈا ایک بار پھر غائب تھا کشمیری اتارکر لے گئے اور گھنٹہ گھر چوک ویران پڑا تھا۔ اس سے اندازہ لگایا جا سکتا ہے کہ کشمیری بھارت سے کتنی نفرت کرتے ہیں۔
