کسی دشمن کو ملک کا امن و امان خراب کرنیکی اجازت نہیں دینگے، اس کیلئے قربانیاں دیں: شیخ رشید
اسلام آباد (نیوزرپورٹر) وفاقی وزیر داخلہ شیخ رشید احمد نے کہا ہے کہ کسی دشمن کو ملک کا امن و امان خراب کرنے کی اجازت نہیں دیں گے۔ دورہ پشاور کے دوران شیخ رشید نے وزیراعلیٰ خیبر پی کے محمود خان کے ساتھ مشترکہ طور پر امن و امان کے حوالے سے اجلاس کی صدارت کی۔ اجلاس میں وزیر داخلہ کو صوبے میں امن و امان کی صورتحال پر بریفنگ دی گئی۔ وفاقی وزیر داخلہ نے امن و امان کے حوالے سے صوبے کی انتظامیہ اور قانون نافذ کرنے والے اداروں کی کارکردگی کو سراہتے ہوئے کہا کہ صوبے نے امن و امان کی صورتحال میں فرنٹ لائن کا کردار ادا کیا۔ انہوں نے کہا کہ امن و امان حاصل کرنے کے لیے ہم نے بڑی قربانیاں دی ہیں اور خیبر پی کے کو تمام ضروری وسائل مہیا کریں گے۔ اجلاس میں خیبر پی کے اور قبائلی اضلاع میں امن و امان کی مجموعی صورتحال کا جائزہ لیا گیا۔
