علی پورچٹھہ میونسپل کمیٹی کے گیٹ کیساتھ تجاوزات ،طلبہ کو گزرنے میں مشکلات

قلعہ دیدار سنگھ،علی پورچٹھہ(نمائندہ خصوصی)علی پورچٹھہ میونسپل کمیٹی نے اپنے دروازے پر ناجائز کھوکھے لگوا لئے۔گورنمنٹ گرلز ہائی کی طلبہ کو گزرنے میں مشکلات کا سامنا، سڑکوں بازاروں میں ناجائز تجاوزات کے خلاف آپریشن کیا جائے۔میونسپل کمیٹی کے دروازے سے ملحقہ ناجائز کھوکھے مبینہ بدعنوانی اور منتھلیوں کا منہ بولتا ثبوت ہے سرکلر روڈ پر بلدیہ کے بالکل سامنے گورنمنٹ گرلزہائی سکول اور ایلیمنٹری سکول واقع ہیں جن کی دیواروں اور گیٹ کے ساتھ پختہ کھوکھے عرصہ دراز سے قائم ہیں۔ شہر میں من پسند کے تحت تجاوزات کے خلاف آپریشن کرکے فوٹو سیشن تک کاروائی محدود کی جارہی ہے۔ چیف آفیسر میونسپل کمیٹی روزانہ ان ناجائز تجاوزات سے آنکھیں چراتے ہوئے بلدیہ دفتر میں آتے جاتے ہیں۔جبکہ متعدد بار سکول انتظامیہ نے شکایات کی مگر ان کے کان پر جوں تک نہیں رینگی۔چیف آفیسر گلریز افضل وڑائچ اس سے قبل بھی کئی بار یہاں تعینات رہ چکے ہیں اس کے برعکس وہ مسائل کے حل بارے پراسرار خاموش رہتے ہیں۔ عوامی سماجی حلقوں نے وزیراعلی پنجاب، چیف سیکرٹری پنجاب، کمشنر اور ڈپٹی کمشنر گوجرانوالہ سے  بدعنوانی پر سخت ایکشن لیتے ہوئے کارروئی کا مطالبہ کیا ہے ۔