خواتین اساتذہ ہائی ہیل، زیورات پہنیں نہ زیادہ میک اپ کریں: محکمہ تعلیم سندھ

کراچی (سٹاف رپورٹر) محکمہ تعلیم سندھ نے سٹیک ہولڈرز کی مشاورت سے سکول اساتذہ کے لیے ضابطہ اخلاق تیار کرلیا۔ ضابطہ اخلاق میں کہا گیا ہے کہ اساتذہ  ایسا لباس پہنیں جو پیشہ ورانہ اقدار اور ثقافتی احترام کی عکاسی کرے۔ خواتین اساتذہ زیادہ میک اپ سے اجتناب برتیں، ہائی ہیلز، زیادہ زیورات پہن کر سکول آنے سے بھی گریز کریں اور  روایتی لباس کا انتخاب کریں۔ مرد اساتذہ بھی  ٹی شرٹ اور جینز  پہن کر سکول آنے سے گریز کریں۔ اساتذہ  اسکول کے احاطے میں گٹکا، نسوار، ماوا، سگریٹ یا اس قسم کی دیگر چیزوں کا استعمال نہیں کرسکتے۔ اساتذہ اپنے طلبا کے ساتھ  پیشہ ورانہ حدود برقرار رکھیں اور پسند ناپسند کی بنیاد پر سلوک سے گریز کرتے ہوئے تمام طلبا کے ساتھ یکساں اور مساوی برتاؤ کا مظاہرہ کریں۔