سکھوں کیخلاف قتل کی سازشیں ’’را‘‘ پر پابندیاں عائد کی جائیں: امریکی کمشن

واشنگٹن(این این آئی) امریکی کمیشن برائے بین الاقوامی مذہبی آزادی نے سکھ کارکنوں کے خلاف قتل کی سازشوں میں ملوث ہونے پر بھارت کی خفیہ ایجنسی’’را ‘‘ پر مخصوص پابندیوں کی سفارش کرتے ہوئے کہا ہے کہ بھارت میں اقلیتوں کو ناروا سلوک کا سامنا ہے۔ کشمیر میڈیا سروس کے مطابق تجزیہ کاروں کا کہنا ہے کہ امریکہ طویل عرصے سے بھارت کو ایشیا اور دیگر جگہوں پر چین کے بڑھتے ہوئے اثر و رسوخ کا مقابلہ کرنے والے ملک کے طور پر دیکھتا رہا ہے اور اسی وجہ سے بھارت میں انسانی حقوق کی پامالیوں کو نظر انداز کرتا رہا ہے۔ 2023ء کے بعد سے بھارت کی طرف سے امریکہ اور کینیڈا میں سکھ رہنمائوں اور کارکنوں کو نشانہ بنانے پر امریکہ اور بھارت کے تعلقات میں سرد مہری سی پیدا ہوگئی اور واشنگٹن نے ایک سابق بھارتی انٹیلی جنس افسر وکاس یادو پر امریکہ میں سازش کا الزام عائد کیا جسے ناکام بنا دیا گیا۔ امریکی کمیشن نے اپنی حالیہ رپورٹ میں کہاکہ2024ء میں بھارت میں مذہبی آزادی کی صورتحال مزید ابتر ہو گئی کیونکہ مذہبی اقلیتوں پر حملوں اور امتیازی سلوک میں اضافہ ہوتا چلا گیا۔ رپورٹ میں کہا گیا ہے کہ ہندو قوم پرست وزیر اعظم نریندر مودی اور ان کی بھارتیہ جنتا پارٹی نے گزشتہ سال انتخابی مہم کے دوران مسلمانوں اور دیگر مذہبی اقلیتوں کے خلاف نفرت انگیز بیان بازی کی اورجھوٹی خبریں پھیلائیں۔ مودی نے گزشتہ سال اپریل میں مسلمانوں کو’’درانداز‘‘ قراردیکر کہا تھا کہ ان کے زیادہ بچے ہوتے ہیں۔ انسانی حقوق اور مذہبی آزادی کے بارے میں امریکی محکمہ خارجہ کی رپورٹوں میں بھارت میں حالیہ برسوں میں اقلیتوں کے ساتھ زیادتیوں کا ذکر کیا گیا ہے۔ کمیشن نے امریکی حکومت کو مذہبی آزادی کی خلاف ورزیوں پر بھارت کو ’’خصوصی تشویش والے ممالک ‘‘کی فہرست میں شامل کرنے اور وکاس یادو اور ’’را ‘‘پر مخصوص پابندیاں لگانے کی سفارش کی ہے۔