کراچی ایئرپورٹ، جعلی سفری دستاویزات پر قطر جانے والا مسافر آف لوڈ

 کراچی(این این آئی)ایف آئی اے امیگریشن نے جعلی سفری دستاویزات پر قطر جانے والے مسافر کو آف لوڈ کردیا۔تفصیلات کے مطابق ایف آئی اے امیگریشن نے کراچی ایئرپورٹ پر کارروائی کرتے ہوئے جعلی سفری دستاویزات پر قطر جانے والے مسافر محمد ریحان کو آف لوڈ کردیا۔ایف آئی اے ترجمان کے مطابق مسافر جعلی پروٹیکٹر اسٹمپ پر ورک ویزہ کے ساتھ قطر جارہا تھا، امیگریشن کلیئرنس کے دوران مسافر کی دستاویزات مشکوک پائی گئیں۔ترجمان نے بتایاکہ مسافر کی جانب سے پیش کیا گیا ای پروٹیکٹر جعلی پایا گیا، مسافر نے ای پروٹیکٹر کیلئے نہ تو خود درخواست دی اور نہ ہی فنگر پرنٹس دیے۔ایف آئی اے ترجمان نے کہا کہ گرفتار مسافر ایجنٹ واجد شاہ سے رابطے میں تھا، ایجنٹ نے مسافر کو ای پروٹیکٹر، ویزہ اور ایمپلائمنٹ کنٹریکٹ فراہم کیا۔ترجمان نے مزید بتایا کہ بیورو آف امیگریشن نے ای پروٹیکٹر کے جعلی ہونے کی تصدیق کی، مسافر نے ویزہ اور پروٹیکٹر کیلئے ایجنٹ کو 5 لاکھ 80 ہزار روپے دیے تھے۔