پاکستان کرکٹ ٹیم کے کپتان بابر اعظم کا کہنا ہے کہ خود سے زیادہ مجھے میری ٹیم پر اعتماد ہے۔رپورٹ کے مطابق ورلڈکپ کیلئے بھارت روانگی سے قبل پریس کانفرنس میں بابر اعظم نے کہا کہ  انہی کھلاڑیوں نے پاکستان کو نمبر ون بنایا ہے، مجھے پتہ ہے کہ کون میرے لیے اور ٹیم کے لیے فائٹ کرتا ہے۔ورلڈکپ سے متعلق بابر اعظم نے کہا کہ بھارت میں پہلی مرتبہ کھیلنے کا دباؤ نہیں ہے،کنڈیشنز کے بارے میں علم ہے،سابق کرکٹرز سے معلومات لینے کی کوشش کی ہے۔ ورلڈ کپ کے لیے بھرپور تیاری ہے، کوشش کریں گے کہ بطور ٹیم اچھا کھیل پیش کریں۔بابر اعظم نے کہا کہ میرے لیے اعزاز ہے کہ میں کپتان کی حیثیت سے کھیل رہا ہوں،کوشش ہے کہ ہم جیت کر آئیں۔ ان ہی لڑکوں کی وجہ سے ہم نمبر ون بنے ہیں، میں ٹیم میں زیادہ تبدیلیوں کا قائل نہیں ہوں، ایشیا کپ کے دو میچز میں ہم اچھا نہیں کھیلے، فیلڈنگ میں کمی تھی، بہتر کرنے کی ضرورت ہے۔ ہر میچ میں ایک جیسی غلطی نہیں ہوتی، ایک غلطی کو کور کرتے ہیں تو دوسری آجاتی ہے۔بابر نے نسیم شاہ کی انجری سے متعلق کہا کہ 'ورلڈکپ میں نسیم کی کمی محسوس ہوگی، اسے ہم کافی یاد کریں گے، وہ شاہین کے ساتھ جیسی بولنگ کرتا تھا وہ ہمیں مختلف وائب دیتا تھا۔ نسیم کے بعد جو بہترین چوائس تھی اسے ٹیم میں لائے ہیں۔چیف سلیکٹر  انضمام الحق ، کوچ مکی آرتھر کی مشاورت سے حسن علی کو منتخب کیا کیونکہ اس کے پاس تجربہ بھی ہے، ابھی نہیں بتاسکتا کہ شاہین کے ساتھ کون نیا گیند کرے گا، قومی ٹیم کو یہی پیغام دیا ہے کہ پہلے بھی کرتے آئے ہیں اور اب بھی کرنا ہے، ہمارا ایک میچ پر فوکس نہیں سب پر ہے، 2019 سے ہم 8سے 9کھلاڑی ایک ساتھ کھیل رہے ہیں۔بابرنے مزید کہا کہ ہمارے اسپنرز بہت اچھے ہیں، مانتا ہوں پرفارم نہیں کیا لیکن ایسا نہیں کہ وہ اچھے نہیں، پاکستان ٹیم میں کھیلنا آسان نہیں ، وہ اچھے ہیں تبھی ٹیم میں ہیں'۔سینٹرل کانٹریکٹ سے متعلق بابر اعظم نے کہا کہ ویزے آچکے ہیں اور ہم جا رہے ہیں، سینٹرل کانٹریکٹ پر بات ہو رہی ہے اور جلد ہوجائیں گے۔ پی سی بی نے ہمیشہ کھلاڑیوں کا اچھا سوچا ہے اس بار بھی اچھا ہی ہو گا'۔