اسلام آباد (خبر نگار خصوصی) وزیراعظم محمد شہباز شریف نے ترکیہ کے سرمایہ کاروں کو پاکستان میں سرمایہ کاری کی دعوت دیتے ہوئے کہا ہے کہ ترکیہ کے ساتھ دوطرفہ تجارت سمیت تمام شعبوں میں تعاون کے فروغ کیلئے پرعزم ہیں۔ دہشت گردی کے خلاف پاکستان اور ترکیہ متحد ہیں۔ ان خیالات کا اظہار انہوں نے جمعہ کو ترکیہ کے صدر رجب طیب اردگان کے ہمراہ مشترکہ پریس کانفرنس سے خطاب کرتے ہوئے کیا۔ وزیراعظم نے کہا کہ وہ  ترکیہ کو اپنا دوسرا گھر سمجھتے ہیں، صدر رجب طیب اردگان کی پرجوش میزبانی پر انتہائی مشکور ہوں۔ انہوں نے کہا کہ پاکستان اور ترکیہ نے ہمیشہ ہر مشکل میں ایک دوسرے کی مدد کی،  دہشت گردی کے خلاف پاکستان اور ترکیہ متحد ہیں۔ انہوں نے کہا کہ ترکیہ کے ساتھ دوطرفہ تجارت سمیت مختلف شعبوں میں تعاون کے مزید فروغ کیلئے پرعزم ہیں۔ انہوں نے کہا کہ  عالمی سطح پر قیمتوں میں اضافہ سے ترقی پذیر ممالک زیادہ متاثر ہو رہے ہیں۔ وزیراعظم نے کہا کہ پاکستان چین کے ساتھ مل کر سی پیک منصوبے کو آگے بڑھا رہا ہے، سی پیک کی تکمیل سے خطہ کی ترقی و خوشحالی کا نیا دور شروع ہو گا۔ انہوں نے کہا کہ ترک سرمایہ کاروں کو پاکستان میں سرمایہ کاری کی دعوت دیتا ہوں، پاکستان میں سرمایہ کاری کے وسیع مواقع موجود ہیں۔ انہوں نے کہا کہ پاکستان ترکیہ یک جان دو قالب اور مثالی برادر ملک ہیں۔ ترکیہ کے صدر رجب طیب اردگان نے پریس کانفرنس سے خطاب کرتے ہوئے کہا کہ آج ہم نے مشترکہ طور پر پی این ایس خیبر کی لانچنگ کی، ہم نے پاکستان کے ساتھ مل کر بہت سے منصوبے مکمل کئے۔ انہوں نے کہا کہ دونوں ملکوں کے دیرینہ برادرانہ تعلقات ہیں، دہشت گردی کے خلاف پاکستان کی ہر ممکن مدد کریں گے، پاکستان نے دہشت گردی کے خلاف بھرپور اقدامات کئے۔ انہوں نے کہا کہ ہم نے پاکستانی سیلاب متاثرہ بہن بھائیوں کی ہر ممکن مدد کی۔ انہوں نے کہا کہ دوطرفہ تجارت میں اضافہ ہماری ترجیحات میں شامل ہے، پاکستان ترکیہ نے ہر مشکل وقت میں ایک دوسرے کا ساتھ دیا، دونوں ممالک عالمی فورمز پر یکساں مؤقف رکھتے ہیں۔ اس سے قبل وزیراعظم محمد شہباز شریف نے ترکیہ کے صدر رجب طیب اردگان کے ہمراہ جمعہ کو پاک بحریہ کے لئے چار ملجم کارویٹ جہازوں میں سے تیسرے جہاز پی این ایس خیبر کا افتتاح کیا جو پاک، ترکیہ سٹرٹیجک پارٹنرشپ میں اہم سنگ میل کا حامل ہے۔ وزیراعظم آفس کے میڈیا ونگ کی جانب سے جاری اعلامیہ کے مطابق وزیراعظم محمد شہباز شریف نے کہا کہ پاکستان اور ترکیہ مل کر ترقی کا سفر جاری رکھیں گے۔  استنبول شپ یارڈ میں پی این ایس خیبر لانچنگ تقریب میں وفاقی وزیر اطلاعات و نشریات مریم اورنگزیب، وفاقی وزیر تجارت سید نوید قمر، وفاقی وزیر دفاعی پیداوار اسرار ترین بھی موجود تھے۔ تقریب میں دونوں ممالک کے قومی ترانے بجائے گئے۔ شپ یارڈ آمد پر وزیراعظم محمد شہباز شریف کو گارڈ آف آنر پیش کیا گیا۔ وزیراعظم محمد شہباز شریف نے تقریب سے خطاب کرتے ہوئے کہا کہ اپنے دوسرے گھر ترکیہ کا دوبارہ دورہ کرنے پر خوش ہوں، پاکستان اور ترکیہ کے درمیان گہرے تاریخی تعلقات ہیں۔ انہوں نے کہا کہ صدر رجب طیب اردگان ایک دور اندیشن رہنما ہیں۔ وزیراعظم نے کہا کہ آپ امن سے رہنا چاہتے ہیں تو آپ کو جنگ کیلئے بھی تیار رہنا ہو گا، آج دنیا کو متعدد تنازعات کا سامنا ہے۔ انہوں نے کہا کہ روس اور یوکرائن کے درمیان گندم برآمد معاہدے میں ترکیہ کا اہم کردار ہے۔ انہوں نے کہا کہ پاک، ترکیہ تعلقات وقت کے ساتھ مزید مضبوط ہوں گے۔ انہوں نے کہا کہ پاکستان اور ترکیہ کو قابل تجدید توانائی ذرائع کے حصول کیلئے مل کر کام کرنا چاہئے، دونوں ممالک آلودگی میں کمی کیلئے بھی مل کر کام کر سکتے ہیں۔   ترکیہ نے پاکستان کے سیلاب متاثرین  کی بھر پور مدد کی۔ ترکیہ سے 15 طیارے امدادی سامان لے کر پہنچے، ماضی میں بھی ہر مشکل گھڑی میں ترکیہ نے پاکستان کی مدد کی۔ وزیراعظم نے جہاز کی تیاری میں حصہ لینے والوں کو خراج تحسین پیش کیا۔ ترکیہ کے صدر رجب طیب اردگان نے خطاب کرتے ہوئے کہا کہ پاک، ترکیہ ماہرین ملجم منصوبہ میں اہم کردار ادا کر رہے ہیں، پاکستان اور ترکیہ کے درمیان گہرے برادرانہ تعلقات ہیں۔ پاکستان اور ترکیہ دہشت گردی کے خاتمہ کیلئے متحد ہیں۔ وفاقی وزیر دفاعی پیداوار اسرار ترین،  پاک بحریہ کے سربراہ ایڈمرل محمد امجد خان نیازی نے تقریب سے خطاب کیا۔ علاوہ ازیں وزیر اعظم شہباز شریف نے کامیڈین اسماعیل تارا کے انتقال پر اظہار تعزیت کیا ہے۔ 

ترکیہ میں زلزلے سے بے گھر لوگوں پر ایک اور قدرتی آفت ،موسلادھار بارش اور برفباری کاسلسلہ جاری