برازیل‘ بس اور ٹرک میں ٹکر، درجنوں افراد ہلاک
برازیل کے شہر ساو پولو میں ایک بس ٹیکسٹائل کمپنی میں کام کرنے والے ملازمین کو لے کر جا رہی تھی وہ ٹرک سے ٹکرا گئی جس میں درجنوں افراد ہلاک ہو گئے۔برازیل کے پولیس حکام کا کہنا ہے کہ جنوب مشرقی علاقے میں کو ایک بس اور ٹرک کے درمیان ہونے والی بھیانک ٹکر میں کم از کم 40 افراد ہلاک ہوگئے۔ مقامی وقت کے مطابق صبح تقریباً سات بجے ایک بس ٹیکسٹائل کمپنی میں کام کرنے والے ملازمین کو ان کی فیکٹری لے کر جا رہی تھی تبھی راستے میں یہ حادثہ پیش آیا۔یہ حادثہ ساوپولو سے 350 کلو میٹر کے فاصلے پر ٹیگوائی علاقے میں پیش آیا۔ اس وقت بس میں تقریبا ً50 ورکر سوار تھے۔ آگ پر قابو پانے والے مقامی عملے نے اپنی ایک ٹویٹ میں کہا، 37 افراد موقع پر ہی ہلاک ہوئے اور باقی تین افراد مقامی سطح کے ایمرجنسی اسپتال میں چل بسے۔ حکام کے مطابق شدید طور زخمی ہونے والے کئی افراد کی حالت کافی نازک ہے۔اس حادثے سے متعلق ٹیلی ویژن پر جو تصاویر نشر کی گئی ہیں اس میں جائے حادثے کے پاس ٹوٹے ہوئے شیشے، بسوں کی سیٹیں اور دونوں گاڑیوں کے ٹوٹے ہوئے بعض حصے شاہراہ کے آس پاس بکھرے ہوئے پڑے تھے۔
