ڈمپنگ سٹیشن پر تعمیراتی کام آرٹیکل 9 اے کی خلاف ورزی: ہائیکورٹ 

لاہور (خبر نگار) لاہور ہائیکورٹ میں کوڑے کو ٹھکانے لگانے اور ڈمپنگ سٹیشن کو ماحول دوست بنانے سے متعلق درخواست کی سماعت کے دوران عدالت نے لاہور ویسٹ مینجمنٹ کمپنی، واسا سمیت تمام فریقین کو جواب جمع کرانے کے لیے آخری مہلت دے دی۔ جسٹس خالد اسحاق نے کیس کی سماعت کی، جبکہ درخواست گزار اظہر صدیق ایڈووکیٹ نے اپنے دلائل پیش کیے۔ دوران سماعت عدالت نے ریمارکس دیئے کہ ڈمپنگ سٹیشن پر تعمیراتی کام آئین کے آرٹیکل 9 اے کی خلاف ورزی ہے۔ درخواست گزار کے مطابق، عالمی نشریاتی ادارے کی رپورٹ میں لکھو ڈیر ڈمپنگ سٹیشن کی صورتحال کو سنگین قرار دیا گیا ہے، جو دیکھنے کے لائق ہے۔ درخواست گزار نے عدالت سے استدعا کی کہ عالمی معیار سے ہٹ کر تعمیر کی گئی ڈمپنگ سائٹس کی تعمیرات کو روکا جائے۔ عدالت نے کیس کی مزید سماعت 11 اپریل تک ملتوی کر دی۔