اسلام آباد (اے پی اے + نوائے وقت رپورٹ) ق لیگ کے رہنما فیصل صالح حیات نے کہا ہے کہ راجہ پرویز اشرف کرپشن میں ملوث ہیں اس لئے میں ان کی کابینہ میں شامل نہیں ہو سکتا جبکہ رضا ہراج کا کہنا ہے کہ صدر زرداری فیصل صالح حیات کو وزارت دینے پر راضی نہیں تھے۔ نجی ٹی وی پروگرام میں گفتگو کرتے ہوئے فیصل صالح حیات کا کہنا تھا کہ کابینہ میں شامل ہونا یا نہ ہونا میرا انفرادی فیصلہ ہے لیکن ووٹ ڈالنا پارٹی فیصلہ ہے اور میں پارٹی کے فیصلہ کو رد نہیں کر سکتا۔ اللہ کے سوا کسی سے نہیں ڈرتا، یہ خبریں غلط ہیں کہ میں انتقامی کارروائی کے ڈر سے راجہ پرویز اشرف کی کابینہ میں شامل نہیں ہوا۔ رضا ہراج نے کہا ہے کہ فیصل نے وزارت کسی اصولی بنیاد پر نہیں لی بلکہ صدر زرداری انہیں وزارت دینے پر راضی نہیں تھے جس کی وجہ فیصل صالح حیات کا راجہ پرویز اشرف کیخلاف سپریم کورٹ میں دائر کیس ہے۔ میں اپنے پارٹی قائدین کا شکرگزار ہوں کہ انہوں نے مجھے وزارت کے قابل سمجھا لیکن میں نے اپنی کچھ ترجیحات کی وجہ سے وزارت لینے سے معذرت کر لی ہے۔