واشنگٹن (نمائندہ خصوصی) امریکہ کے سابق صدر جمی کارٹر نے کہا ہے کہ پاکستان، افغانستان اور یمن میں ہونے والے ڈرون حملے انسانی حقوق کے چیمپئن امریکہ کی طرف سے انسانی حقوق کی مسلسل خلاف ورزی ہیں اور یہ ان کی اخلاقیات پر سوالیہ نشان ہیں۔ نیویارک ٹائم میں لکھے گئے اپنے ایک مضمون میں جمی کارٹر نے اوباما انتظامیہ جارج ڈبلیو بش کے ساتھ کانگریس کو بھی شدید تنقید کا نشانہ بنایا ہے اور کہا ہے کہ ان حملوں سے امریکہ کی خارجہ پالیسی بُری طرح متاثر ہو رہی ہے۔ انہوں نے کہا کہ یہ حملے جن میں سینکڑوں معصوم لوگ مارے گئے ہیں یہ 1948ءمیں جاری ہونے والے ہیومن رائٹس کے ڈیکلیریشن کے آرٹیکل 19اور30کی کھلم کھلا خلاف ورزی ہیں جس کے تحت انسانوں کو ظالمانہ سزاﺅں کے خلاف آواز اٹھائی گئی تھی۔ واضح رہے کہ جمی کارٹر کو 2002ءمیں انسانی حقوق اور جمہوریت کا حامی ہونے پر نوبل پرائز بھی دیا گیا تھا۔ انہوں نے نائن الیون حملوں کے بعد اپنائی جانے والی پالیسی پر شدید تنقید کی ہے ۔ واضح رہے افغان صدر حامد کرزئی نے بھی ڈرون حملوں میں سویلین ہلاکتوں پر احتجاج کیا تھا۔