لاہور (خصوصی رپورٹر) پاکستان مسلم لیگ (ن) کے صدر محمد نوازشریف نے کہا ہے کہ عام انتخابات سے قبل وسیع تر اتحاد وجود میں آ جائے گا جس میں وہ لوگ شامل نہیں ہوں گے جو موجودہ حکمرانوں کے اتحادی ہیں اور ایک نااہل اور بددیانت حکومت کی بیساکھیاں بنے ہوئے ہیں۔ مسلم لیگ (ن) کے مرکزی سیکرٹریٹ کی افتتاحی تقریب سے خطاب کرتے ہوئے محمد نوازشریف نے کہا کہ یہ سیکرٹریٹ پاکستان کی تعمیروترقی کا تھنک ٹینک بنے گا۔ اللہ کے فضل سے ہم تجربہ کار اور آزمائی ہوئی ٹیم رکھتے ہیں جس نے ماضی میں بھی ملک کی تصویر اور تقدیر بدلنے میں اہم کردار ادا کیا، ہم مستقبل کے لئے بھی واضح لائحہ عمل رکھتے ہیں۔ ہمارے پاس ملک کے روشن اور محفوظ مستقبل کے لئے ایجنڈا ہے اور ٹیم بھی۔ ہم ایسے آئیڈیاز رکھتے ہیں جو ملک کی اقتصادی حالت بدل ڈالیں گے، نوجوان مایوس نہ ہوں، مسلم لیگ (ن) ان کے شاندار مستقبل کی ضامن ہے۔ مسلم لیگ نے ماضی میں بھی بیرون ملک مقیم پاکستانیوں کے لئے اہم پالیسیاں اختیار کیں‘ ہم اب بھی ان کے لئے شاندار پیکج دیں گے، ملک کے اندر ہی نہیں بیرون ملک بھی پاکستان کا بے پناہ ٹیلنٹ موجود ہے جسے بروئے کار لایا جائے گا۔ ہم ایسی پالیسیاں دیں گے کہ بیرون ملک مقیم پاکستانی اعتماد اور یقین کے ساتھ اپنے وطن واپس آئیں گے اور اپنے سرمائے سے‘ تجربے سے اور اپنے ٹیلنٹ سے پاکستان کی خدمت کریں گے۔ اس سیکرٹریٹ میں عظیم منصوبے بھی بنیں گے اور عمل کی راہیں بھی نکلیں گی۔ عوام ان چہروں کو بھول نہیں سکتے جو آصف زرداری اور ان کی حکومت کے اتحادی ہیں اور اس کے دست و بازو اور بیساکھیاں بنے ہوئے ہیں۔ کیا انہیں معلوم نہیں کہ حکومت نے قوم کو بدترین لوڈشیڈنگ‘ انتہائی درجے کی کرپشن‘ دہشت گردی‘ سپریم کورٹ کی توہین‘ گمشدہ افراد اور قومی خودمختاری کی پامالی سمیت کن کن عذابوں سے دوچار کر رکھا ہے۔ پیپلزپارٹی سے زیادہ اس کے اتحادی موجودہ حالات کے ذمہ دار ہیں۔ عوام ایک ایک چہرہ دیکھ رہے ہیں۔ آصف زرداری کک بیکس سے جمع کئے ہوئے سوئس بنکوں میں موجود سرمائے کے تحفظ کے لئے کتنے وزرائے اعظم قربان کریں گے؟ اب قوم کے سامنے اصل سوال یہ ہے کہ خود آصف زرداری کب جائیں گے؟ آمرانہ سوچ کے حوالے سے پرویزمشرف اور آصف زرداری میں کوئی فرق نہیں۔ فروری 2008ءکے عام انتخابات کے بعد ایک سال کے اندر انہوں نے پنجاب حکومت توڑ کر یہاں گورنر راج نافذ کر دیا۔ ڈوگر کورٹس سے مجھے نااہل قرار دلوایا۔ عدلیہ کی بحالی کے تحریری معاہدوں سے منحرف ہو گئے اورعدلیہ کی بحالی کی مزاحمت کرتے رہے۔ مشرف دور میں عدلیہ کی بحالی کا مرحلہ درپیش تھا تو اب عدلیہ کی آزادی‘ اس کی توقیر اور اس کے فیصلوں پر عملدرآمد کرانے کا مرحلہ درپیش ہے۔ مسلم لیگ آزاد عدلیہ کے خلاف موجودہ حکمرانوں کے کسی منصوبے اور کسی سازش کو کامیاب نہیں ہونے دے گی۔ تقریب میں سٹیج سیکرٹری کے فرائض احسن اقبال نے ادا کئے۔ افتتاحی تقریب میں مولانا شاہ احمد نورانی کے صاحبزادے اویس نورانی‘ پیر اعجاز ہاشمی اور قاری زوار بہادر نے بھی شرکت کی۔ تقریب سے سینیٹر اسحاق ڈار کے علاوہ عطا الحق قاسمی‘ نورالحسن تنویر اور افتخار بٹ نے بھی خطاب کیا۔ سٹیج پر میاں محمد نوازشریف کے ساتھ وزیراعلیٰ شہبازشریف‘ ممتاز بھٹو‘ ممنون حسین‘ اسحاق ڈار‘ پیر صابر شاہ‘ راجہ فاروق حیدر موجود تھے۔ تقریب میں انجینئر امیر مقام‘ سرتاج عزیز‘ غلام دستگیر‘ سینیٹر ایم حمز ہ‘ طارق عظیم‘ انور بیگ‘ ماروی میمن‘ انوشہ رحمن‘بیگم عشرت اشرف‘ نزہت صادق‘ الٰہی بخش سومرو‘ سردار مہتاب احمد خاں‘ سینیٹر پرویزرشید‘ سردار ذوالفقار کھو سہ، خواجہ سعد رفیق شیخ قیصر، احسان الحق باجوہ، حسن مرتضی، چوہدری شفیع، آزاد علی تبسم، ‘ پرویز ملک‘ ایاز صادق‘ عبدالحق بلوچ‘ اور عابد شیر علی سمیت متعدد رہنماﺅں نے شرکت کی۔