کوروناوائرس کے حوالے سے تحقیق کرنے والے عرب ممالک میں سعودی عرب پہلے جبکہ عالمی سطح پر 14 ویں نمبر پر آگیا۔ غیرملکی خبررساں ادارے کے مطابق وبا سے متعلق تحقیق کرنے والے ممالک میں عالمی سطح پر سعودی عرب 17 ویں نمبر پر تھا لیکن اب 14 ویں رینکنگ کی گئی ہے۔ تحقیق سے متعلق فہرست میں عرب ممالک میں سعودی عرب پہلے، جی ٹوئنٹی ممالک میں 12 ویں جبکہ بین الاقوامی سطح پر 14 ویں نمبر پر آگیا ہے۔ سعودی وزیر تعلیم حماد الشیخ نے اس اہم اعزاز پر سعودی فرمانروا شاہ سلمان اور ولی عہد محمد بن سلمان کا خصوصی شکریہ ادا کیا کیوں کہ انہوں نے تحقیق کے شعبے میں بڑے اقدامات اٹھائے۔ ان کا کہنا تھا کہ شاہ سلمان اور ولی عہد محمد بن سلمان نے سعودی یونیورسٹیوں میں تحقیق، جدت اور سائنسدانوں کی حمایت کی، کورونا کی تحقیق میں عالمی سطح پر کامیابی سے ظاہر ہوتا ہے کہ مملکت مہلک وائرس کے علاوہ ہر قسم کے بحران سے نمٹنے کی بھی صلاحیت رکھتا ہے۔ سعودی وزیر نے یہ بھی کہا کہ مملکت میں بڑے پیمانے پر وبا سے متعلق تحقیقی رپورٹس سامنے آئیں جبکہ 84 فیصد رپورٹس سعودی یونیورسٹیوں نے شایع کیں۔

گوجرانوالہ:نجی کالج کے ہمراہ ٹریفک قوانین کے حوالے سے آگاہی واک