پشاور(بیورو رپورٹ) پشاور ہائی کورٹ نے پرویز مشرف کو پھانسی کی سزا دینے پروفاقی وزراء کی پریس کانفرنس پر توہین عدالت کی درخواست پر وزیراعظم عمران خان سے بیان حلفی طلب کر لیا۔ وزیراعظم کے مشیر برائے داخلہ امور شہزاد اکبر اور سابق اٹارنی جنرل انور منصور عدالت میں پیش ہوئے۔ شہزاد اکبر نے غیر مشروط معافی مانگتے ہوئے کہا کہ وہ توہین عدالت کا سوچ بھی نہیں سکتے۔ خود کو عدالت کے رحم و کرم پر چھوڑتا ہوں۔ انور منصور نے بھی غیر مشروط معافی مانگتے ہوئے موقف اختیار کیا کہ پتہ نہیں مجھے کیوں فریق بنایا گیا۔ جسٹس روح الامین نے ریمارکس دیئے کہ عدالت اور پارلیمنٹ سپریم ادارے ہیں۔ اس کا احترام سب پر لازم ہے۔ کسی کے خلاف کوئی فیصلہ آئے تو جذبات میں نہیں آنا چاہیے۔ آپ اس وقت ایک ذمہ دار عہدے پر فائز تھے۔ آپ ان کو روک سکتے تھے شاید اسی وجہ سے آپ کو فریق بنایا گیا ہے۔ کوئی عام ملزم اگر اس طرح کرے تو ہم اس کو چھوڑ دیتے ہیں۔ اس کو ہم برداشت کرتے ہیں۔ اگر بڑے عہدے پر بیٹھے لوگ اس طرح کرتے ہیں تو اچھی بات نہیں ہے۔ عدالت نے وزیراعظم، وفاقی وزیر فواد چودھری اور فردوس عاشق اعوان کو آئندہ سماعت پر پیش ہونے کا حکم بھی دیا۔