پاکستان سپر لیگ (پی ایس ایل) سیزن 10 کے 16 ویں میچ میں ملتان سلطانز نے لاہور قلندرز کےلیے 186 رنز کا ہدف سیٹ کیا ہے۔
قذافی اسٹیڈیم لاہور پر کھیلے جارہے میچ میں ملتان سلطانز نے مقررہ 20 اوورز میں 3 وکٹ پر 185 رنز بنائے اور لاہور قلندرز کو 186 رنز کا ہدف دیا۔
ملتان سلطانز کے آؤٹ ہونے والے کھلاڑیوں میں یاسر خان 24، عثمان خان 18 اور شائے ہوپ 9 رنز شامل تھے۔
کپتان محمد رضوان نے 48 گیندوں پر 76 رنز بنائے، ناقابل شکست رہنے والے بیٹر نے اس دوران 3 چھکے اور 6 چوکے لگائے۔
دوسری طرف کامران غلام نے کپتان کا پورا ساتھ دیا، 31 گیندوں پر 52 رنز کی باری کھیلنے والے بیٹر نے 4 چھکے اور 2 چوکے لگائے وہ بھی ناٹ آؤٹ رہے۔
دونوں کھلاڑیوں نے چوتھی وکٹ پر59 گیندوں پر 115 رنز کی شراکت قائم کی اور اس دوران شاہین آفریدی،حارث روف، آصف آفریدی سمیت کسی بھی بولر کی ایک نہ چلنے دی۔
لاہور قلندرز کی طرف سے ٹام کرن، حارث روف اور ڈیرل مچل نے 1، 1 وکٹ اپنے نام کی۔
اس سے قبل لاہور قلندرز نے ملتان سلطانز کے خلاف ٹاس جیت کر فیصلہ کیا تھا، میچ میں لاہور قلندرز کی قیادت شاہین شاہ آفریدی جبکہ ملتان سلطانز کی کپتانی کے فرائض محمد رضوان نبھارہے ہیں۔
سیزن 10 میں ملتان سلطانز اور لاہور قلندرز کا چھٹا میچ ہے، شاہین آفریدی الیون نے 2 میچز جیتے جبکہ 3 میں اسے شکست کا سامنا کرنا پڑا ہے، اسی طرح ملتان سلطانز کو صرف 1 میچ میں فتح ملی ہے جبکہ 4 میچز میں اسے شکست کا سامنا کرنا پڑا ہے۔
اس میچ میں لاہورقلندرز کی فائنل الیون میں فخر زمان، عبداللّٰہ شفیق، سکندر رضا، محمد نعیم، ڈیرل مچل، سیم بلنگز، شاہین آفریدی، آصف علی، حارث رؤف، ٹام کرن اور آصف آفریدی شامل ہیں۔
دوسری طرف ملتان سلطانز کی ٹیم میں شائی ہوپ، عثمان خان، کامران غلام، محمد رضوان، افتخار احمد، مائیکل بریسویل، عاکف جاوید، محمد حسنین، عبیدشاہ اور جوشوا لٹل کھیل رہے ہیں