جنرل ہسپتال: 2روزہ انٹرنیشنل’’ لائیو رہینو پلاسٹی ورکشاپ‘‘شیلڈ ،سرٹیفکیٹس تقسیم 

لاہور(نیوز رپورٹر)پرنسپل امیر الدین میڈیکل کالج پروفیسر ڈاکٹر محمد الفرید ظفر نے کہا چہرہ کسی بھی شخصیت کی اصل خوبصورتی ہے اورجدید دور میں شوبز اور دیگر شعبوں سے وابستہ مرد و خواتین اپنی ٹیڑھی، چپٹی اور بد وضع ناک کو سرجری کے ذریعے خوبصورت بنا کر اپنی شخصیت کو پر اعتماد اورپر کشش بناتے ہیں۔ ناک کا یہ جدید طریقہ علاج سے آپریشن ’’رہینو پلاسٹی ‘‘ پر نجی شعبوں میں لاکھوں روپے خرچ ہوتے ہیں جبکہ لاہور جنرل ہسپتال میں ناک،کان اور گلہ کے سرجنز مذکورہ آپریشن کی سہولت مفت فراہم کر رہے ہیں جو انتہائی قابل ستائش امر ہے۔ ڈاکٹرز کو چاہیے کہ وہ خود کو جدید طبی تحقیق اور ٹیکنالوجی سے جس قدر ممکن ہو آگاہ رکھیں کیونکہ ان کا تعلق براہ راست مریضوں کے علاج وزندگی اور فلاح پر ہوتا ہے۔ ان خیالات کا اظہار انہوں نے لاہور جنرل ہسپتال میں ای ٹی این ڈیپارٹمنٹ کے زیر اہتمام 2 روزہ انٹرنیشنل’’ لائیو رہینو پلاسٹی ورکشاپ‘‘ کے شرکاء میں شیلڈ اور سرٹیفکیٹس تقسیم کرتے ہوئے کیا۔ ڈاکٹر محمد الیاس اور ڈاکٹر عامر ایوب اعوان اس کورس کے ڈائریکٹر تھے۔ تمام ڈاکٹرز نے کامیاب ورکشاپ کے انعقاد پر پرنسپل پروفیسر الفرید ظفر، ایم ایس اور کورس کے ڈائریکٹر ماسٹر ٹرینیز کی کاوشوں کو سراہا۔