پاکستان کے خلاف بھارتی دہشت گردی کا ثبوت اس سے بڑا اور کیا ہو سکتا ہے کہ خود بھارتی وزیر اعظم نریندر مودی نے کہا کہ جس طرح بھارت نے مشرقی پاکستان کے عوام کو حقوق دلوائے اور بنگلہ دیش بنادیا۔ بالکل اسی انداز میں اب ہم بلوچستان۔آزاد کشمیر اور گلگت و بلتستان کے عوام کو حقوق دلوائیں گے۔ گلگت میں پیر کے روز عوامی احتجاج کی آڑ میں سرکاری املاک کو جلایا گیا،اس سے بھارت کے مکروہ عزائم آشکارا ہو گئے ہیں۔بدقسمتی سے پاکستان کے بعض طبقات بھارت کے ایجنٹ کا کردار ادا کر رہے ہیں اورو ہ کھلم کھلا اعلان کر چکے ہیں کہ گلگت میں قراقرم ہائی وے کو بلاک کر کے سی پیک کا دھڑن تختہ کر دیا جائے گا۔ یہ باریک کام اب شروع ہو چکا ہے۔پاکستان کے وزیر خارجہ شاہ محمود قریشی اور ڈی جی آئی ایس پی آر میجر جنرل بابر افتخار نے ایک مشترکہ میڈیا بریفنگ میں بھارت کے دہشت گردانہ عزائم کو بے نقاب کیا ہے۔ایک طرف بھارت نے پاکستان کی ورکنگ بائونڈری اورآزاد کشمیر کی کنٹرول لائن پر جنگ بندی معاہدے کی سنگین خلاف ورزی شروع کر دی ہے اور معصوم شہریوں کو توپوں کی گولہ باری سے شہید کیا جا رہا ہے اور افواج پاکستان کے دلیر گھبرو جوانوں اور افسروں کو بھی بلا وجہ شہید کیا جا رہا ہے۔
بھارت نے بزدلانہ کارروائی میں معصوم شہریوں کو نشانہ بنایا۔وزیر خارجہ نے کہا کہ ا یل او سی پر بھارتی اشتعال انگیزی کی شدید مذمت کرتے ہیں۔ انہوںنے اس عزم کاا ظہار بھی کیا کہ بھارت کے اصل چہرے کو دنیا کے سامنے بے نقاب کرتے رہیں گے۔پاکستان نے نائن الیون کے بعد دہشت گردی کے خلاف جنگ میں بھاری قیمت ادا کی اورا وپر سے بھارت ہمیںمزید نشانہ بنا رہا ہے۔بھارت ریاستی دہشت گردی کو فروغ دے رہا ہے۔ وزیر خارجہ نے کہا کہ ہمارے پاس شواہد ہیں کہ بھارت دہشت گردی کا سرپرست ہے جس کی وجہ سے پاکستان کو سوا سوارب ڈالر سے زیادہ کا نقصان پہنچا۔وقت آ گیا ہے کہ اب قوم اور بین الاقوامی برادری کو اعتماد میں لیا جائے ۔ ڈی جی آئی ایس پی آر نے کہا ہے کہ بھارت نے پاکستان کو غیر مستحکم کرنے کا منصوبہ بنایا ہے۔ اور وہ مسلسل جنگ بندی معاہدے کی خلاف ورزیاں کر رہا ہے۔ اور کالعدم تنظیموں کی معاونت کر رہا ہے۔بھارت کالعدم تنظیموں کا کنسورشیم بنا رہا ہے اورپاکستان مخالف قوتوں کو متحد کر کے کارروائیوں پر اکسایا جا رہا ہے۔پاکستان میں ہونے والی حالیہ دہشت گردی کی کارروائیوں کے پیچھے بھارت ہے۔افغانستان میں موجود بھارتی کرنل راجیش دہشت گرد تنظیموں کے ساتھ رابطے میں ہے۔بھارت نے حال ہی میں داعش کے تیس دہشتگردوں کو پاکستان اور اردگرد کے خطے میں منتقل کیا ہے ۔بھارت دہشتگردوں کو تربیت اور اسلحہ فراہم کر رہا ہے۔ ڈی جی آئی ایس پی آر نے دہشت گردوں کے ساتھ بھارتی روابط کے شواہد پیش کئے۔
وزیر خارجہ اور ڈی جی آئی ایس پی آر نے جو نکات اٹھائے ہیں یہ ناقابل تردید اور ٹھوس شواہد پر مبنی ہیں،بھارت کی چیرہ دستی کی تفصیلات سے بچہ بچہ آگاہ ہے اوردنیا جانتی ہے کہ بھارت کی بی جے پی حکومت ایک فاشسٹ تنظیم آر ایس ایس کے بطن سے پیدا ہوئی ہے۔آر ایس ایس کا فلسفہ وہی ہے جو نازی جرمنی کے ہٹلر کا تھا، ہٹلر کو جنون تھا کہ جرمن قوم کے سامنے ساری قومیں ہیچ اور نیچ کی حیثیت رکھتی ہیں اور باقی نسلوں کو وہ جینے کے حق سے محروم کرنا چاہتا تھا جس کے لئے اس نے ہولو کاسٹ کیا اور آج بھارت بھی کشمیر میں ہولو کاسٹ کا مرتکب ہو رہا ہے اورکشمیریوں کی نسل کشی کے لئے ا س نے اپنے آئین سے آرٹیکل پینتیس اے حذف کر دیا ہے، تاکہ کشمیریوں کو ختم کر کے وہاں انتہا پسند ہندوئوں کوبسا یا جا سکے۔ یو این چارٹر کی رو سے نسل کشی یا کسی اکثریت کو سازش سے اقلیت میں تبدیل کرنے کو جنگی جرم قرار دیا گیاا ور سربیا کے قصاب کو انسانی حقوق کی عالمی عدالت میں اس کے انہی جنگی جرائم کے تحت سزا دی گئی ، بھارت کا وزیر اعظم مودی اس سے بڑھ کر جنگی جرائم کا مرتکب ہور ہاہے، اس نے وزیراعلی گجرات کے طورپر دو ہزار مسلمانوں کو ایک ٹرین میں آگ لگا کر بھسم کیا جس پرامریکہ نے اسے دہشت گردوں کی عالمی لسٹ میں شامل کر دیا اور اپنے ملک کا اسے ویزہ دینے سے ہمیشہ انکار کیا۔ جب سے وہ وزیراعظم بنا ہے توا سکی وحشت اوربربریت میں اضافہ ہوچکا ہے اور اسنے کشمیرمیں قتل عام کو شعار بنا لیا ہے اور کنڑول لائن پر بسنے والے معصوم شہریوںکو بھی شہید کر رہا ہے، اس نے نئی دلی میں امریکی صدر ٹرمپ کی موجودگی میں تین راتوں تک مسلمانوں کا خون بہایااور ان کی دکانوں اور ان کے مکانوں کوآگ لگا کر خاکستر کیا، اس نے شہریت کا ایک قانون لاگو کر کے کروڑوںمسلمانوں اور غیر ہندوئوں کو بھارتی شہریت سے محروم کرنے کا ناپاک منصوبہ بنایا ہے،کشمیر میں تو اسکے جرائم حد سے زیادہ بڑھ گئے ہیںاورا س نے لوگوں کی نقل وحرکت کو ختم کر دیا ہے اوپر سے کرونا لاک ڈائون نے کشمیریوں کی زندگی اجیرن بنا دی ہے۔
پاکستان اور علاقے میں دیگر چھوٹے ہمسایوں کے خلاف بھارتی را نے داعش کو متحرک کر دیا ہے۔ پاکستان نے برسوں کی قربانیوں سے دہشت گردی پر قابو پا لیا تھا مگر اب بھارتی را کے تربیت یا فتہ اور ڈالر کمائو گروہ نے ایک بار پھر پاکستان کو لہو لہان کر دیا ہے۔، آئے روز بلوچستان کے بے گناہ لوگوں کو نشانہ بنایا جا رہا ہے یا کراچی میں امن ا مان کوتباہ کر دیا گیا ہے۔ بھارت چاہتا ہے کہ پاکستان کی ایٹمی طاقت کو اپنے ایجنٹوںکے ذریعے سبوتاژ کر کے عدم استحکام کا شکار بنا دے ا ور اسے بھوٹان ، سکم کی طرح ایک بغلی ریاست میں تبدیل کر دے۔
پاکستان نے بھارت کے مذموم ارادوں کا پردہ چاک کر دیا ہے ا ور اقوام عالم سے کہا ہے کہ وہ بھارت کے دست ستم کو توڑیں تاکہ علاقے میںامن قائم رہ سکے۔
٭…٭…٭
بول کہ لب آزاد ہیں تیرے … یاد نہیں دلائوں گا
Mar 18, 2024