ہلال احمر کی جانب سے150 ٹرانس جینڈر میں رمضان پیکیج کی تقسیم
اسلام آباد(خصوصی نمائندہ) ہلال ِاحمر پاکستان کے زیر ِ اہتمام جڑواں شہروں کے 150 ٹرانس جینڈر میں رمضان پیکیج کے تحت راشن کی تقسیم، ترک سفیر احسان مصطفی یرداکُل مہمانِ خصوصی تھے۔ چیئرمین ہلالِ احمر پاکستان ڈاکٹر سعید الٰہی، سیکرٹری جنرل غلام محمد اعوان ، ترُک ریڈ کریسنٹ کے ہیڈ ابراہیم کارلوز کے علاوہ ہلالِ احمر کے آفیسرز ، عملہ بھی موجود تھا۔ ہلالِ احمر پاکستان کے پلیٹ فارم سے پہلی بار رمضان المبارک میں ٹرانس جینڈر کیلئے راشن تقسیم کیا گیا ہے۔ فوڈ پیکیج ساڑھے 25 کلو کا ہے جس میں کھانے ،پینے کی تمام ضروری اشیاء شامل ہیں۔ فوڈ پیکیج کی تقسیم ہلالِ احمر پاکستان کے لان میں منعقد کی گئی۔ اِس موقع پر ہلالِ احمر پاکستان کے چیئرمین ڈاکٹر سعید الٰہی نے کہا کہ ٹرانس جینڈر ہمارے معاشرے کا حصہ ہیں ،اِن کا خیال رکھنا ہماری ذمہ داری ہے۔برادر ملک ترکی اور ترک ریڈ کریسنٹ کے ساتھ برادرانہ تعلقات اہمیت کے حامل ہیں۔ترک ریڈ کریسنٹ کا یہ اقدام مستحسن ہے اور آنے والے دنون میں یہ تعاون مذید مستحکم ہو گا اور ٹرانس جینڈر کے علاوہ مستحق افراد کی ضرورت پوری کی جائے گی۔ ہلال ِاحمر نے ٹرانس جینڈر کمیونٹی کو معاشرے کا مفید شہری بنانے کیلئے متعدد پروگرام شروع کر رکھے ہیں۔ انہیں ماہِ مقدس میں راشن کی فراہمی امدادی سلسلے کی کڑی ہے۔