جنوبی افریقہ کیخلاف میچ میں بھارتی شائقین نے پاکستان کے حق میں نعرے لگائے
اسلام آباد (این این آئی)آئی سی سی ورلڈ کپ کے سلسلے میں گزشتہ روز پاکستان بمقابلہ جنوبی افریقا کے میچ کے دوران بھارتی کرکٹ شائقین نے پاکستانی ٹیم کی حمایت میں نعرے لگائے اور میچ جیتنے کیلئے قومی ٹیم کی حوصلہ افزائی کرتے رہے ۔لندن کے لارڈز گرائونڈ میں کھیلے جانے والے پاکستان اور جنوبی افریقا کے میچ کے دوران بھارتی کرکٹ شائقین بھی بھارتی جرسیاں پہنے گرائونڈ میں میچ دیکھنے آئے اور پاکستانی ٹیم کاجیتنے کیلئے حوصلہ بڑھایا۔ بھارتی شائقین نے پاکستانی ٹیم کی حمایت میں نعرے لگانے کے ساتھ ساتھ پلے کارڈز بھی اْٹھا رکھے تھے جن پر لکھا تھا کہ پڑوسیوں کی سپورٹ آپ کے ساتھ ہے۔اس سے قبل مانچسٹر میں 16 جون کو ہوئے پاکستان بمقابلہ بھارت میچ میں قومی ٹیم کے کپتان سرفراز احمد نے ٹاس جیت کر بھارت کو بیٹنگ کی دعوت دی ، ان کا یہ فیصلہ غلط ثابت ہوا اور پاکستان کو بھارت کے ہاتھوں بد ترین شکست پر پاکستانی عوام کی جانب سے قومی ٹیم کو کڑی تنقید کا سامنا کرنا پڑا تھا۔
