نیب کی استدعا، سعد، سلمان رفیق کی ضمانت منسوخی کی درخواستیں بغیر کارروائی ملتوی
اسلام آباد (خصوصی رپورٹر) سپریم کورٹ میں خواجہ سعد رفیق اور سلمان رفیق کی ضمانتیں منسوخی کی درخواستیں نیب کی استدعا پر بغیر کارروائی ملتوی کر دیں گئیں۔ پیراگون سوسائٹی کیس میں خواجہ سعد رفیق اور سلمان رفیق کی ضمانت منسوخی کیس کی سماعت جسٹس مقبول باقر کی سربراہی میں تین رکنی بنچ نے کی۔ دوران سماعت عدالت کو بتا یا گیا کہ پراسیکیوٹر نیب جہانزیب بھروانہ کی التوا کی درخواست دائر کی گئی ہے جس پر جسٹس مقبول باقر نے کہا نیب کی اپیل123 دن زائد المیعاد ہے۔ نیب کو نظرثانی اپیل میں ملزموں کو ضمانت دینے پر تو کوئی اعتراض نہیں۔ سعد رفیق کے وکیل اشتر اوصاف نے کہا اگر نیب نے التوا ہی لینا تھا تو بتا دیتے ہم لاہور سے آئے ہیں، جسٹس مظاہر علی اکبر نے کہا اسلام آباد کا موسم اتنا اچھا ہے آپ اسے انجوائے کریں۔
