اسلام آباد (خبر نگارخصوصی) متحدہ عرب امارات کے ولی عہد محمد بن زید نے وزیراعظم عمران خان سے رابطہ کرکے لاہور دھماکے کی شدید مذمت کرتے ہوئے قیمتی جانوں کے ضیاع پر اظہار افسوس کیا۔ تفصیلات کے مطابق وزیراعظم عمران خان اور متحدہ عرب امارات کے ولی عہد محمد بن زید کے درمیان ٹیلیفونک رابطہ ہوا، جس میں محمد بن زید نے لاہور دھماکے کی شدید مذمت کرتے ہوئے قیمتی جانوں کے ضیاع پر اظہار افسوس کیا۔ یو اے ای کے ولی عہد کا کہنا تھا کہ مشکل وقت میں غم زدہ خاندانوں کیساتھ کھڑے ہیں اور زخمیوں کی جلد صحت یابی کیلئے دعاگو ہیں۔ متحدہ عرب امارات کے ولی عہد نے پاکستانی قیادت، حکومت اور عوام کیساتھ اظہار یکجہتی کیا۔ وزیراعظم عمران خان نے اظہار یکجہتی پر یواے ای کے ولی عہد محمد بن زید سے اظہار تشکر کیا۔ اس موقع پر وزیراعظم نے کہا پاکستان دہشت گردی کے خلاف جنگ جاری رکھے گا، دہشت گردی میں ملوث عناصر اپنے انجام کو پہنچیں گے۔ وزیراعظم عمران خان اور متحدہ عرب امارات کے ولی عہد کے درمیان ٹیلی فونک گفتگو میں دو طرفہ تعلقات اور باہمی تعاون پر بھی بات چیت ہوئی اور دونوں ممالک کی قیادت کے درمیان رابطوں کے تسلسل پر اتفاق کیا گیا۔ وزیراعظم کا کہنا تھا کہ دہشت گرد حملوں کے مرتکب افراد کو انصاف کے کٹہرے میں لایا جائے گا۔ وزیراعظم کا کہنا تھا کہ دونوں ممالک کی قیادت کے درمیان متواتر اور خوشگوار بات چیت برادرانہ تعلقات کی علامت ہے۔ انہوں نے دونوں ممالک کے دوطرفہ تعلقات مزید مضبوط بنانے‘ علاقائی اور عالمی امور پر قریبی روابط جاری رکھنے کی خواہش کا اظہار بھی کیا۔ وزیراعظم عمران خان کی زیرصدارت پارٹی کی سنٹرل ایگزیکٹو کمیٹی کا اجلاس ہوا۔ وزیراعظم نے پارٹی معاملات پر مشاورت کی۔ پارٹی کی تنظیم سازی اور دائرہ کار بڑھانے پر مشاورت کی گئی۔ وزیراعظم عمران خان کی زیرصدارت حکومتی ترجمانوں کا اجلاس ہوا۔ سیاسی و معاشی صورتحال پر ترجمانوں کو بریفنگ دی گئی۔ وزیراعظم نے کہا کہ اپوزیشن ڈیل کی افواہیں پھیلا کر سیاسی ماحول بنا رہی ہے۔ مجرموں سے ڈیل قوم سے غداری کے مترادف ہے۔ ن لیگ سیاسی جماعت نہیں مافیا کی طرح آپریٹ کر رہی ہے۔ انہوں نے ہر شعبے میں رانا شمیم جیسے لوگ استعمال کئے۔ وزیراعظم نے ہدایت کی کہ کرپشن کیخلاف بیانیہ پر فرنٹ فٹ پر کھیلیں۔ کرپشن کیخلاف بیانیے سے پیچھے نہیں ہٹیں گے۔ کرپشن کیخلاف بیانیہ کے ساتھ حکومت کے اچھے کام اجاگر کریں۔ عالمی ادارے معیشت کے بارے میں مثبت اشارے دے رہے ہیں۔ پاکستانی معیشت ترقی کر رہی ہے۔ کاروباری کمپنیاں ریکارڈ منافع کما رہی ہیں۔ وزیراعظم سے معاون خصوصی محمد شہزاد ارباب نے ملاقات کی۔ وزیراعظم کو مختلف وزارتوں کے ساتھ کئے گئے معاہدوں پر بریفنگ دی گئی۔ عمران خان کی زیرصدارت سپیشل اکنامک زونز پر اجلاس ہوا۔ سپیشل اکنامک زونز میں سرمایہ کاروں کی سہولت کیلئے حکومتی اقدامات پر بریفنگ دی گئی۔ بریفنگ میں بتایا گیا کہ رشکئی‘ بولان اور علامہ اقبال انڈسٹریل سٹی فعال ہو چکے ہیں۔ وزیراعظم عمران خان سے چیئرمین کشمیر کمیٹی شہریار آفریدی نے ملاقات کی۔ پرویز خٹک اور شبلی فراز نے بھی شرکت کی۔ وزیراعظم عمران خان کی زیرصدارت وفاقی کابینہ کا اجلاس آج ہوگا۔ ملکی سیاسی و معاشی صورتحال کا جائزہ لیا جائے گا۔وزیراعظم نے کہا کہ معاشی گروتھ سے متعلق بہتری پر عوام اور دنیا کو آگاہ کیا جائے۔ عوام کو بتائیں سابقہ حکومتیں کیا معیشتیں چھوڑ کر گئیں اور موجودہ حکومت نے کیا بہتری کی۔ وزیراعظم نے کہا کہ عوام کو بتائیں ن لیگ ماضی میں کیسے عدلیہ کو دبائو میں لاتی رہی۔ عوام کو بتائیں ن لیگ نے رفیق تارڑ کو کیسے بریف کیس دے کر بلوچستان بھیجا۔ عوام کو بتائیں رانا شمیم نے کہاں بیٹھ کر بیان حلفی تیار کیا۔ میرا شریف فیملی سے کوئی مقابلہ نہیں۔ شہبازشریف بتائیں ملک مقصود کون ہے؟ ایک چپڑاسی کے اکائونٹ سے 18 سو کروڑ روپے شہبازشریف کے اکائونٹ میں گئے۔ شریف فیملی اپنی کرپشن پر کوئی جواب نہیں دیتی۔ کرپشن کرنے والا اپوزیشن لیڈر بنا بیٹھا ہے۔ وزیراعظم نے ترجمانوں اور وزیر اطلاعات فواد چودھری کو گائیڈ لائنز دیں۔ ارکان نے مشورہ دیا کہ وزیراعظم سب کو کہہ دیں کسی سے مت ڈریں۔ 

شمالی کوریا میں کرونا بے قابو، فوج تعینات