جنوبی وزیرستان کے ضلعی ہیڈکوارٹر وانا میں زیرِ زمین پانی کی سطح تیزی سے کم ہو نے لگی ۔جنوبی وزیرستان کے ضلعی ہیڈ کوارٹر  وانا میں زیرِ زمین پانی کی سطح مسلسل کم ہونے کے باعث پینے کے پانی کے مسائل اور زرعی ضروریات متاثر ہو نے لگیں،اس مسئلے پر ڈیرہ اسماعیل خان میں ہونے والی کانفرنس میں قبائلی اراکین قومی و صوبائی اسمبلی، انتظامیہ، ماہرین اور قبائلی مشران سر جوڑ کر بیٹھے۔ماہرین کے مطابق پوری قوم کو اس مسئلے پر سر جوڑ کر بیٹھنا ہوگا، ہر شہری کو پانی کا کم سے کم استعمال سیکھنا ہو گا، قوم کو جدید ٹیکنالوجی کے استعمال کی طرف راغب کرنا ہو گا۔ماہرین کا کہنا ہے کہ دنیا میں پینے کے لیے 8فیصد جبکہ زراعت کے لیے 69فیصد پانی استعمال ہوتا ہے، دنیا میں زراعت کا شعبہ ڈرپ اور ٹنل فارمنگ کی طرف جا رہا ہے۔انہوں نے مزید کہا کہ پاکستان میں بھی ڈرپ اور ٹنل فارمنگ اپنانے کی ضرورت ہے، یہ سیکھنا ہو گا کہ کس فصل کو کس وقت کتنے پانی کی ضرورت ہے۔کانفرنس میں ڈی آئی جی سعید خان وزیر نے شہرہ آفاق نظم سنا ہے جنگلوں کا بھی کوئی دستور ہوتا ہے کے ذریعے بنیادی مسئلے پر سب کو اکٹھا ہونے کا پیغام دیا۔