مجھ سمیت کوئی افسر وی آئی پی پروٹو کول نہیں لے گا:شیخ رشید

Aug 25, 2018 | 12:11

ویب ڈیسک

وفاقی وزیرریلوے شیخ رشید نے کہا ہے کہ ہمیں کفایت شعاری کی پالیسی پر عملدرآمد کرانا ہے، مجھ سمیت کوئی افسر وی آئی پی پروٹو کول نہیں لے گا، پاکستان کے عوام ہی ہمارے لیے وی آئی پی ہیں، سکون سے بیٹھوں گا نہ کسی کو آرام کرنے دوں گا، میرا ٹارگٹ آمدن بڑھانا اور خسارہ کم کرنا ہے، افسران تعاون کریں،کوئی افسر آرام کرتا نظر نہ آئے سب فیلڈ میں جائیں، ریلوے کیلئے بزنس لائیں ۔ شیخ رشید کی زیر صدارت ریلوے ہیڈ کوارٹرز میں اجلاس ہوا جس میں سیکرٹری ریلوے نے شیخ رشید کو بریفنگ دی، ذرائع کے مطابق ریلوے کو اس وقت 37ارب کا خسارہ ہے۔ شیخ رشید نے کہا کہ جب تک یہاں ہوں سکون سے بیٹھوں گا نہ کسی کو آرام کرنے دوں گا، میرا ٹارگٹ آمدن بڑھانا اور خسارہ کم کرنا ہے، افسران تعاون کریں۔ شیخ رشید کا کہنا تھا محکمہ اخراجات کم کرے اور سارا زور آمدن بڑھانے پر لگائے، مارکیٹنگ اسٹریٹجی اور فریٹ ٹرینوں پر خاص فوکس ہوگا، پرائیویٹ سیکٹر کو متوجہ کریں، ان کیلئے سازگار ماحول بنائیں۔ انہوں نے کہا ریلوے کی زمینوں پر کمرشل پلازے بنانے کی ضرورت ہے۔وفاقی وزیر نے ریلوے اسٹیشنز کے قریب گندگی ختم کرنے کیلئے صفائی ٹاسک فورس بنانے کا بھی اعلان کیا۔ انہوں نے کہا ریلوے کے تمام اسپتالوں کو پرائیوٹائز کریں لیکن مزدور کو نقصان نہ ہو، کوئی افسر آرام کرتا نظر نہ آئے سب فیلڈ میں جائیں، ریلوے کیلئے بزنس لائیں۔

مزیدخبریں