خود کو کسٹم اہلکار ظاہر کرکے شہری کو لوٹنے میں مصروف 4 رکنی گینگ گرفتار

راولپنڈی(اپنے سٹاف رپورٹرسے) روات پولیس نے بروقت کاروائی کرتے ہوئے خود کو کسٹم اہلکار ظاہر کرکے شہری کو لوٹنے میں مصروف 04 رکنی گینگ کو گرفتار کرلیا،گرفتار ملزمان کی شناخت زیشان، حسن، اسد اور فرحان کے نام سے ہوئی، شہری سے اسلحہ کی نوک پر چھینی گئی گاڑی برآمد، ملزمان سے جعلی نمبر پلیٹیں، ہتھکڑی، ریوالونگ لائٹ، وائرلیس سیٹ اور اسلحہ بھی برآمدہوا، ملزمان شہری سے واردات کر رہے تھے کہ پولیس نے مشکوک جان کر چیک کیا،ملزمان نے اپنا تعارف کسٹم اہلکاروں کے طور پر کروایا جو تحقیقات پر ثابت نہ کر سکے، ملزمان خود کو سرکاری ادارے کے اہلکار ظاہر کر کے گاڑیاں روکتے اور شہریوں کو لوٹتے تھے، گرفتار ملزمان کو شناخت پریڈ کے لیے جیل منتقل کیا جا رہا ہے،بروقت اور موثر کارروائی پر ایس پی صدر نے اے ایس پی صدر، ایس ایچ او روات اور ٹیم کو شاباش دیتے ہوئے کہا کہ سرکاری ادارے کے اہلکاروں کے روپ میں وارداتیں کرنے والا گینگ متعدد وارداتوں میں مطلوب تھا، ملزمان سے تفتیش میں اہم انکشافات اور مزید برآمدگی متوقع ہے۔