پاکستان مشکل صورتحال سے دو چار، باہمی اختلافات بھلا کر متحد ہونا ہو گا: راغب نعیمی 

لاہور (خصوصی نامہ نگار) چیئرمین اسلامی نظریہ کونسل علامہ ڈاکٹر راغب حسین نعیمی نے کہا ہے کہ یوم پاکستان سے ہمیں قومی یکجہتی کا درس ملتا ہے۔ ملک و قوم کی سلامتی اور ترقی کیلئے تمام طبقات کو کردار ادا کرنا ہو گا۔ 23 مارچ ہمیں اتحاد، قربانی اور عزم کی تجدید کا درس دیتا ہے۔ باہمی اختلافات بھلا کر وطن عزیز کے مفادات کو مقدم رکھ کر ملکی ترقی و خوشحالی کیلئے متحد ہونا ہو گا۔ علماء سے گفتگو کرتے ہوئے انہوں نے مزید کہاکہ پاکستان اس وقت مشکل صورتحال سے دوچار ہے۔ بلوچستان کے حالات دور اندیشی پر مبنی اقدامات کے متقاضی ہیں۔ معاشی چیلنجوں کا مقابلہ کرنے اور پاکستان کو ایک مستحکم اور خوشحال ملک بنانے کے لیے معاشرے میں اتحاد، رواداری اور ہم آہنگی کی ضرورت ہے۔ 23 مارچ کا اہم اور یادگار دن تحریک پاکستان میں سنگ میل کی حیثیت رکھتا ہے، اس روز قرارداد پاکستان منظور کی گئی۔ قائداعظم محمد علی جناح کی بصیرت افروز قیادت میں آزاد پاکستان حاصل کیا گیا۔ یوم پاکستان مناتے وقت پوری قوم کی طرف سے تعمیر پاکستان کے عزم کی تجدید کر کے آپس کے اختلافات کو بھلا کر ملکی ترقی اور خوشحالی کی جانب تیزی سے آگے بڑھنا اور دہشت گردی کے خاتمہ کیلئے مل کر کام کرنا ہو گا۔