کراچی(سپورٹس ڈیسک ) ہنگری کے دارالحکومت بڈاپسٹ میں ورلڈ سوئمنگ چیمپئن شپ کے دوران امریکہ سے تعلق رکھنے والی آرٹسٹک سوئمر انیتا ایلوریز کو ان کی کوچ نے اس وقت بچایا جب وہ پانی کے اندر بے ہوش ہونے کے باعث ڈوبنے لگی تھیں۔انیتا ایلوریز نے ورلڈ ایکواٹکس چیمپئن شپ کے سولو فری فائنل کو مکمل کررہی تھیں جب وہ اچانک بے ہوش کر سوئمنگ پول کی تہہ میں چلی گئیں۔ان کی کوچ اینڈریا فیونٹس کو فوری طور پر کسی گڑبڑ کا احساس ہوگیا اور انہوں نے پول میں چھلانگ لگا کر انیتا ایلوریز کو باہر نکالا۔

انیتا ایلوریز تیسری بار ورلڈ چیمپئن شپ میں شرکت کررہی تھیں اور جب ان کو باہر نکالا گیا تو سانس تھمی ہوئی تھی۔سوئمرکو فوری طبی مرکز میں منتقل کیا گیا اور ٹیم یو ایس اے کی جانب سے بتایا گیا کہ اب انیتا کی حالت بہتر ہے۔اینڈریا فیونٹس نے بتایا کہ اس واقعہ کے باوجود انیتا ایلوریز 24 جون کو ٹیم ایونٹ کو مکمل کرنے کیلئے پرامید ہیں۔یہ بہت زیادہ خوفزدہ کردینے والا واقعہ تھا، میں بہت ڈر گئی تھی کیونکہ وہ سانس نہیں لے رہی تھی، مگر اب اس کی حالت بہتر ہے۔یہ پہلا موقع نہیں جب انیتا ایلوریز سوئمنگ پول میں بے ہوش ہوگئی تھیں، اس سے قبل 2021 میں اولمپک کوالیفائر مقابلوں میں بھی اسی طرح کا واقعہ پیش آیا تھا اور اس موقع پر بھی ان کی کوچ نے انہیں بچایا تھا۔

جمہوری معاشرے میں میڈیا پرسنز پر حملے بالکل ناقابل قبول ہیں،شہباز شریف