ایڈ منسٹر یٹر کا دورہ شہر ، نکاسی آب کے کاموں کا جا ئزہ کیا
کراچی (اسٹاف رپورٹر) ایڈمنسٹریٹر کراچی، مشیر قانون اور ترجمان حکومت سندھ بیرسٹر مرتضیٰ وہاب نے بدھ کی شب ہونے والی بارش کے بعد شہرکے مختلف علاقوں کا دورہ کیا اور نکاسی آب کے کاموں کا جائزہ لیا، اس موقع پر میونسپل کمشنر افضل زیدی، مینیجنگ ڈائریکٹر سندھ سالڈ ویسٹ مینجمنٹ زبیر چنا اور دیگر حکام بھی ان کے ہمراہ تھے، ایڈمنسٹریٹر کراچی نے ضلع جنوبی میں آئی آئی چندریگر روڈ، پی آئی ڈی سی، مائی کولاچی روڈ ،صدر، شاہین کمپلیکس، تین تلوار کلفٹن، برنس روڈ سمیت ملحقہ علاقوں کا دورہ کیا اور بارش کے بعد کی صورتحال کا جائزہ لیا، انہوںنے کہا کہ بعض نشیبی علاقوں میں کچھ پانی جمع ہونے کی شکایات ملی تھیں، تاہم سڑکوں پر کے ایم سی اور ڈی ایم سیز، واٹر بورڈ، سندھ سالڈ ویسٹ مینجمنٹ کے عملے نے نکاسی آب کا کام تیزی سے انجام دیاجس سے صورتحال کنٹرول میں رہی، ایڈمنسٹریٹر کراچی بیرسٹر مرتضی وہاب وزیر مینشن، گارڈن، ایم اے جناح روڈ کے بعد ضلع وسطی پہنچے اور کے ڈی اے چورنگی، ناگن چورنگی، یو پی موڑ اور دیگر علاقوں کا دورہ کیا،انہوں نے خاص طور پر نشیبی علاقوں میں نکاسی آب کے کاموں کا جائزہ لیا اور عملے کو ضروری ہدایات دیں، انہوں نے قلندریہ نالہ اور شادمان نالے کی صفائی مکمل کرنے کے احکامات دئیے تاکہ نکاسی آب میں رکاوٹ دور کی جاسکے، اس موقع پر ڈپٹی کمشنر ضلع وسطی طحہ سلیم نے ایڈمنسٹریٹر کراچی بیرسٹر مرتضی وہاب کو نکاسی آب کے کاموں سے متعلق تفصیلات بتاتے ہوئے کہا کہ نشیبی علاقوں میں نکاسی آب کا کام تیزی سے جاری ہے، ایڈمنسٹریٹر کراچی نے ہدایت کی کہ جن علاقوں میں نکاسی آب کاکام ہورہا ہے وہاں متعلقہ اداروں کے عملے کی موجودگی کو یقینی بنایا جائے تاکہ شہر کے کسی حصے میں بارش کا پانی جمع نہ رہے، بعدازاں ایڈمنسٹریٹر کراچی ضلع شرقی پہنچے اور گُرو مندر، مزار قائد، ٹیپو سلطان روڈ، طارق روڈ، گلستان ظفر نالہ سمیت متصل علاقوں کا جائزہ لیا انہوں نے شاہراہ فیصل، نرسری، کارساز، سندھی مسلم سوسائٹی اوردیگر ملحقہ علاقوں کا دورہ بھی کیا اور وہاں نکاسی آب کی صورتحال کا جائزہ لیا، انہوں نے کہا کہ مختلف نشیبی علاقوں میں بھاری مشینری کے ساتھ نکاسی آب کا کام انجام دیا گیا۔
