عمران نے ٹرمپ کے سامنے کشمیر کے حل سے متعلق دوٹوک موقف پیش کیا: شیخ رشید

اسلام آباد (اے پی پی) وفاقی وزیر ریلوے شیخ رشید احمد نے وزیراعظم عمران خان کے کامیاب دورہ امریکہ کو عوامی امنگوں کا ترجمان قرار دیتے ہوئے کہا ہے کہ پہلی مرتبہ پاکستان کے وزیراعظم نے دو ٹوک انداز میں مسئلہ کشمیر ، افغستان میں مفاہمتی عمل سمیت خطے کے تنازعات کے حل سے متعلق پر اپنا ٹھوس موقف امریکی صدر کے سامنے رکھا ہے۔ وزیراعظم عمران خان کے دورہ امریکہ سے پاک امریکہ باہمی تجارت کے فروغ میں بھی مدد ملے گی ۔ منگل کو قومی خبر رساں ادارے "اے پی پی" سے خصوصی گفتگو کرتے ہوئے وفاقی وزیر ریلوے شیخ رشید احمد نے کہا کہ امریکہ کی جانب سے مسئلہ کشمیر کے حل کے لئے ثالثی کی پیشکش، وزیراعظم عمران خان کے ہمسایہ ممالک کے ساتھ خوشگوار تعلقات کے موقف کی تائید ہے ، وزیراعظم عمران خان نے ہمیشہ ہمسایہ ممالک کے ساتھ خوشگوار تعلقات پر زور دیا ہے۔ انہوں نے کہا کہ پاکستان افغانستان میں قیام امن اور مفاہمتی عمل میں اپنا مثبت کردار ادا کر رہا ہے، امریکہ نے بھی پاکستان کے اس کردار کا اعتراف کیا ہے۔ وفاقی وزیر ریلوے شیخ رشید احمد نے کہا کہ وزیراعظم عمران خان نے افغانستان کے سیاسی حل پر زور دیا اور دوٹوک انداز میں واضح کیا کہ افغانستان کا کوئی فوجی حل نہیں ہے۔ انہوں نے کہا کہ وزیراعظم عمران خان کی دانشمندانہ پالیسیوں اور فیصلوں سے ملک ترقی اور عوام خوشحالی کی شاہراہ پر گامزن ہے۔ ایک سوال کے جواب میں انہوں نے کہا کہ کرپشن کے بے تاج بادشاہ وزیراعظم عمران خان کے دورہ پر تنقید کر رہے ہیں ۔