پاکستانی بھائیوں‘ بہنوں مفت ویکسین فراہمی کیلئے تیز رفتار منصوبہ تیار کر رہے ہیں: چینی وزارت خارجہ
بیجنگ (صباح نیوز) چین نے پاکستان کو کرونا ویکسین کا ایک بیچ مفت فراہم کرنے کا اعلان کرتے ہوئے کہا ہے کہ دونوں ممالک طویل عرصے سے وبا پر قابو پانے کے لیے مل کر کام کر رہے ہیں۔ عالمی خبر رساں ادارے کے مطابق چین کی وزارت خارجہ کی ترجمان ہوا چونئنگ نے میڈیا بریفنگ کے دوران ایک سوال کے جواب میں بتایا کہ چینی حکومت نے اپنے پاکستانی بھائیوں اور بہنوں کے لییویکسین کی ایک کھیپ بطور تحفہ فراہم کرنے کا فیصلہ کیا ہے۔ ہوا جونئنگ نے مزید بتایا کہ پاکستان کو کرونا ویکسین برآمد کرنے کے لیے تیز رفتار منصوبہ تیار کر رہے ہیں۔ تاہم انہوں نے یہ نہیں بتایا کہ ویکسین کی کتنی مقدار بھیجی جائے گی اور وہ ویکسین کون سی ہوگی۔ گزشتہ روز پاکستان کے وزیر خارجہ شاہ محمود قریشی کی اسی حوالے سے اپنے چینی ہم منصب کے ساتھ ٹیلی فون پر گفتگو ہوئی تھی جس کے بعد پاکستان کے وزیر خارجہ نے اعلان کیا تھا کہ چین نے31 جنوری تک پاکستان کو کرونا ویکسین کی 5 لاکھ خوراکیں بطور تحفہ دینے کا وعدہ کیا ہے۔
