ازبکستان کیساتھ تمام شعبوں میں تعلقات بڑھانے کی ضرورت ہے: صدر علوی
اسلام آباد (نوائے وقت رپورٹ) صدر ڈاکٹر عارف علوی نے کہا ہے کہ پاکستان ازبکستان کے ساتھ تعلقات کو بڑی اہمیت دیتا ہے۔ دونوں ممالک کے درمیان سیاست، تجارت، معیشت اور ثقافت سمیت باہمی مفادات کے تمام شعبوں میں تعاون کو فروغ دینے کی ضرورت ہے۔ وہ ازبکستان میں پاکستان کے نامزد سفیر سید علی اسد گیلانی سے بات چیت کر رہے تھے۔ صدر مملکت نے کہا کہ سیاحت، تجارت، معیشت اور ثقافت سمیت باہمی مفادات کے تمام شعبوں میں ازبکستان کے ساتھ تعلقات بڑھانے کی ضرورت ہے۔ صدر عارف علوی نے کہا کہ دونوں ممالک کے درمیان اعلی سطحی دوروں ، پارلیمانی تبادلوں اور وزارتی رابطوں کی ضرورت ہے۔ انہوں نے نامزد سفیر پر زور دیا کہ وہ دونوں ممالک کے مابین تجارتی اور معاشی تعلقات کو فروغ دینے ، ازبکستان میں پاکستانی تیار شدہ مصنوعات، دوائیں اور خدمات کی برآمدات بڑھانے کیلئے کام کریں۔
