لاہور (نیوز رپورٹر+نوائے وقت رپورٹ) مریم نواز شریف نے کہا ہے کہ این اے 75 ڈسکہ الیکشن سے متعلق سچ بتا دیں، ورنہ مجھے بتانا پڑے گا۔ مریم نواز نے اپنی ٹویٹ  میں دعویٰ کیا کہ دو افراد کے نام میرے پاس آ چکے ہیں۔ یہ دھاندلی نہیں، منظم آپریشن تھا جو اعلیٰ سطح سے مینج ہوا۔ ان کا کہنا تھا کہ الیکشن کمیشن کا عملہ اغوا کرکے پوری رات ایک مقام پر رکھا گیا۔ تحریک انصاف کے سرکردہ اراکان کی موجودگی میں نتائج تبدیل کرائے گئے۔ لیگی رہنما مریم نواز نے سوال اٹھایا کہ 14 گھنٹے بعد ان کا اچانک باجماعت وارد ہو جانا نچلے لیول کا کام ہے؟۔ اس سے قبل مریم نواز نے اپنے بیان میں کہا تھا کہ پرویز رشید ایک فرد کا نہیں، سوچ اور نظریے کا نام ہے۔ پرویز رشید کے نااہل ہونے پر ٹویٹ کرتے ہوئے انہوں نے کہا کہ پرویز رشید جمہوریت کی ایک روشن علامت کا نام ہے۔ ایسی علامتیں ہر حال میں زندہ رہتی ہیں۔ وہ کل بھی پارٹی کا اثاثہ تھے۔ آئندہ بھی نواز شریف کے معتبر ساتھی اور جمہوریت کے جانباز سپاہی کی حیثیت سے سرمایہ رہیں گے۔مریم نواز نے مزید کہا کہ جھوٹ اور فریب کے کھیل میں اسی طرح لینے کے دینے پڑ جاتے ہیں۔ الزام تراش جھوٹوں کے ٹولے کے منہ پر ایک اور زناٹے دار طمانچہ۔ براڈ شیٹ کو لندن فلیٹس کے بارے میں سوال اٹھانے اور پھر عدالت سے بھاگ جانے پر نواز شریف کے وکلاء کو 45 لاکھ روپے ادا کرنے پڑے۔ کچھ شرم کچھ حیا؟  جو چھپ چھپ کہ براڈ شیٹ والوں کو ملتے تھے اور اپنا حصہ مانگتے تھے۔ اب سب حقائق عوام کے سامنے آئیں گے۔

گوجرانوالہ:نجی کالج کے ہمراہ ٹریفک قوانین کے حوالے سے آگاہی واک