مقبوضہ کشمیر کی صورتحال خراب کرنے کے ذمہ دارہم خود ہیں‘پلوامہ واقعہ پر پاکستان جیت گیا بھارت ہار گیا:بھارتی دانشور
نئی دہلی (نیٹ نیوز) بھارتی دانشور پرتاب بھانو مہتا نے اعتراف کیا ہے کہ مقبوضہ کشمیر کی صورتحال خراب کرنے کے ذمہ دارہم خود ہیں، پلوامہ واقعہ پر پاکستان جیت گیا بھارت ہار گیا، پاکستان پر کوئی عالمی، سیاسی اور سفارتی دبائو نہیں، بھارت نیم روایتی جنگ میں پاکستان کو شکست دینے کی صلاحیت نہیں رکھتا۔ اخبار دی انڈین ایکسپریس میں شائع ہونے والے مضمون میں پرتاب بھانو مہتا نے اعتراف کیا پلوامہ حملے کے بعد ہمارا رویہ ایسا ہوگیا جیسے پاکستان جیت چکا۔ سرجیکل سٹرائیک جیسا کوئی عمل صورتحال کو تبدیل نہیں کرسکتا۔ امریکہ جیسی بڑی طاقت بھی افغانستان میں بے بس ہوگئی۔ بھارت نیم روایتی جنگ میں پاکستان کو شکست دینے کی صلاحیت نہیں رکھتا۔ پرتاب بھانو مہتا نے لکھا پاکستان کے خلاف بھارت نے اپنی استعداد کار میں اضافہ نہیں کیا۔ پاکستان جیت گیا کیونکہ مقبوضہ کشمیر میں احساس محرومی حقیقی ہے۔ بھارتی دانشور نے اعتراف کیا 5 سال میں مقبوضہ کشمیر کی صورتحال خراب کرنے کے ذمہ دار ہم خود ہیں۔ پلوامہ حملے کے بعد عوام میں غصہ اپنی ہی تباہی کا باعث بن گیا۔ پاکستان جیت گیا کیوں کہ بھارت کی ثقافت گل سڑ گئی ہے۔ پرتاب بھانو کا کہنا تھا پلوامہ حملے کے بعد بھارت خود شدید گھٹن کا شکار ہے۔ حملے کے بعد سوچ بچار کے بجائے یہ تلاش کرتے رہے کہ کسے الزام دیا جائے۔ بھارت کامیاب خفیہ آپریشن کرنے اور جدید فنی صلاحیتیں حاصل نہیں کرسکا۔ بھارت کی بڑھکیں مارنے والی سیاسی قیادت امن قائم کرنے کی صلاحیت نہیں رکھتی اور اس صورتحال کا اعتراف کرنا ہمارے لیے مشکل ہے۔