اُردن نے الاخوان المسلمون پر پابندی لگا دی، اثاثے منجمد

عمان (نوائے وقت رپورٹ) اردن نے جماعت الاخوان المسلمون پر پابندی عائد کر دی۔ عرب میڈیا کے مطابق اردن کے وزیر داخلہ مازن عبداللہ کا کہنا ہے کہ اخوان المسلمین پر عائد پابندی فوری طور پر نافذ العمل ہوگی۔ وزیر داخلہ نے بتایا کہ اخوان المسلمین کے اثاثے، دفاتر اور بنک اکاؤنٹس منجمد کر دئیے گئے جبکہ اُردن میں اخوان المسلمین کے دفاتر اور مراکز کا گھیراؤ کر لیا گیا ہے۔ اُردن میں دہشتگردی کی منصوبہ بندی کے الزام میں 16 افراد گرفتار، حملے کیلئے تیار میزائل بھی برآمد، مازن عبداللہ کا کہنا تھا کہ پابندی کا اطلاق اخوان المسلمین سے وابستہ تمام تنظیموں اور اداروں پر بھی ہو گا۔ انہوں نے کہا کہ اخوان المسلمین کی سوچ اور فکر کی ترویج ملک دشمنی کے مترادف ہے۔ دہشت گردی پھیلانے کی سازش میں اخوان المسلمین کے ملوث ہونے کے پختہ شواہد ملے ہیں۔