ہائیکورٹ : حج پالیسی   2025 ء چیلنج ‘ درخواست قابل سماعت ہونے پر فیصلہ محفوظ

لاہور(خبرنگار)حج پالیسی 2025ء  لاہور ہائیکورٹ میں چیلنج کردی گئی ۔عدالت نے درخواست کے قابل سماعت ہونے کے متعلق فیصلہ محفوظ کرلیا۔جسٹس محمد ساجد محمود سیٹھی نے شہری فیصل ارشاد کی درخواست پر سماعت کی۔وفاقی حکومت کی جانب سے اسسٹنٹ اٹارنی جنرل زین قاضی نے درخواست کے قابل سماعت ہونے پر اعتراض اٹھایا اور موقف اختیار کیا کہ حج پالیسی حکومت کا پالیسی معاملہ ہے۔  عدالت مداخلت نہیں کرسکتی ‘ درخواست گزار کی جانب سے موقف اختیار کیا گیا کہ وہ پاکستان اٹامک انرجی کمشن کا ملازم ہے، حکومت موذنین حجاج کے کوٹے میں ان کی درخواست پر غور نہیں کر رہی، حج پالیسی امتیازی ہے اور آئین کے آرٹیکل 25 سے متصادم ہے۔ حج پالیسی 2024ء ٹھیک ہے ، درخواست گزار کی جانب سے استدعا کی گئی کہ عدالت حج پالیسی دو ہزار پچیس کو کالعدم قرار دے۔