اسلام آباد: کورونا وائرس نے وزیر اعظم ہاؤس کے بعد ایوانِ صدر کا رخ کر لیا/خاتونِ اول ثمینہ علوی بھی کورونا وائرس کا شکار ہو گئیں جن کے ٹیسٹ کا نتیجہ مثبت آیا ہے۔
سماجی رابطے کی ویب سائٹ ٹوئٹر پر رات گئے اپنے پیغام میں خاتونِ اول ثمینہ علوی نے کہا کہ ایک روز قبل میں نے کورونا کا ٹیسٹ کرایا تھا جس کا نتیجہ مثبت نکلا۔ میرے جسم میں کورونا وائرس پائے جانے کی تصدیق ہوگئی۔
I was tested positive for covid, day before. I have a little bit of weakness but Alhamdulillah doing well otherwise. Request all to keep me in your prayers please.
— Samina Alvi (@Saminalvi) September 23, 2021
Thank you.
ٹوئٹر پیغام میں خاتونِ اول ثمینہ علوی نے مزید کہا کہ مجھے کورونا وائرس کے باعث تھوڑی بہت کمزوری ہے تاہم اللہ کا شکر ہے کہ مجھے کورونا کی شدید علامات کا سامنا نہیں ہے اور میری طبیعت بہتر ہے۔
پیغام میں کورونا وائرس میں مبتلا خاتونِ اول نے پاکستان کے عوام اور سیاسی و سماجی شخصیات سے اپیل کی کہ ان کی جلد سے جلد صحتیابی کیلئے دعا کریں۔ انہوں نے نیک تمناؤں کیلئے پاکستانیوں کا شکریہ بھی ادا کیا۔
خیال رہے کہ اِس سے قبل پاکستان میں کورونا کے 2 ہزار 357 نئے کیسز رپورٹ ہوئے جبکہ گزشتہ 24 گھنٹوں کے دوران 58 مزید شہری جاں بحق ہو گئے۔
نیشنل کمانڈ اینڈ آپریشن سینٹر (این سی او سی) کے جاری کردہ اعدادوشمار کے مطابق ملک بھر میں مجموعی طور پر 12 لاکھ 32 ہزار 595 افراد کورونا سے متاثر ہوئے جبکہ وائرس کا شکار 27 ہزار 432 افراد انتقال کر گئے۔
کورونا کی تشخیص کیلئے گزشتہ 24 گھنٹوں کے دوران 48ہزار151 ٹیسٹ کیے گئے جس سے مجموعی ٹیسٹس کی تعداد 1 کروڑ 90 لاکھ 49 ہزار329 ہوگئی۔ ملک بھر میں کورونا ٹیسٹ کا نتیجہ مثبت آنے کی شرح 4.89فیصد رہی۔