بھارت کی مرکزی و صوبائی حکومتیں اقلیتوں کیخلاف ہندو گروپوں کا تشدد روکنے میں ناکام ہوگئیں:امریکی محکمہ خارجہ
امریکہ کے محکمہ خارجہ کی ایک رپورٹ میں بھارت میں مذہبی آزادی کی ابتر صورتحال اجاگر کرتے ہوئے کہا گیا ہے کہ ہندو تنظیموں کی طرف سے اقلیتوں پر حملے ملک میں تشدد کو مسلسل ہوا دے رہے ہیں۔ محکمہ خارجہ نے عالمی مذہبی آزادی کی سالانہ رپورٹ2018 میں کہا کہ گزشتہ سال کے دوران ہندو تنظیموں کی طرف سے اقلیتی برادریوں خصوصاً مسلمانوں پرحملوں کا سلسلہ جاری رہا۔ رپورٹ میں کہا گیا کہ بھارتی حکومت نہ صرف اقلیتوں ،پسماندہ طبقوں اور حکومت کے نقادوں پر حملوں پر کارروائی کرنے میں ناکام رہی بلکہ اکثر اس نے ملزموں کو قانونی کارروائی سے بھی بچایا۔محکمہ خارجہ نے کہا کہ بھارت میں مرکزی اور ریاستی حکومتوں اور سیاسی جماعتوں کے ارکان نے جانبدارانہ اقدامات کئے جن سے اقلیتی مسلمانوں کو نقصان پہنچا۔رپورٹ میں مسلم شناخت کے حامل بھارتی شہروں کے نام تبدیل کئے جانے کی تجاویز خصوصاً الہ آباد کا نامPrayagraj رکھنے کی تجویز کا بھی ذکر کرتے ہوئے کہا گیا کہ ان تجاویز کا مقصد بھارتی تاریخ سے مسلمانوں کی خدمات کو مسخ کرنا ہے۔