سعودی عرب :کرونا ویکسین کی دوسری خوراک سے متعلق اہم ہدایت
سعودی سیکریٹری صحت نے کرونا ویکسین کی دوسری خوراک سے متعلق اہم ہدایت جاری کرتے ہوئے کہا ہے کہ اسے پہلی خوراک کے اثرات ختم ہونے سے پہلے لیا جائے۔
تفصیلات کے مطابق سعودی سیکریٹری صحت ہانی جوخدار نے کہا ہے کہ کرونا ویکسین کی دوسری خوراک پہلی خوراک کے اثرات برقرار رہنے کی حالت میں لی گئی تو ایسی صورت میں پہلی خوراک کی تاثیر برقرار رہے گی اور ویکسین لینے والے کو کسی طرح کی کوئی مشکل نہیں ہوگی۔
سعودی میڈیا کے مطابق سیکریٹری صحت نے اس استفسار کا جواب دیا تھا کہ کرونا ویکسین کی دوسری خوراک مقررہ وقت پر نہ لینے کی صورت میں کیا نقصان ہو سکتا ہے۔
سیکریٹری صحت کا کہنا تھا جو لوگ کرونا ویکسین کی پہلی خوراک لے چکے ہیں انھیں دوسری خوراک ویکسین بنانے والی کمپنی کی سفارش کے عین مطابق مؤثر وقت میں دی جائے گی۔
سیکریٹری صحت کے مطابق 19 سے 42 دن کے درمیان کرونا ویکسین کی دوسری خوراک لی جا سکتی ہے۔ انھوں نے یہ خوش خبری بھی دی کہ آئندہ تین ہفتوں کے اندر کرونا ویکسین مطلوبہ مقدار میں سعودی عرب پہنچ جائے گی۔
یاد رہے کہ کرونا ویکسین کی پہلی خوراک مطلوبہ وقت سعودی عرب نہ پہنچنے کے باعث شیڈول تبدیل کر کے تاریخ آگے بڑھا دی گئی تھی۔
