ہڈیوں کے کینسر سے شفایاب ہونے والی ایک نوجوان امریکی خاتون ٹیکنالوجی کے شعبے کی اب ارب پتی شخصیت جیرڈ آئزک مین کے ساتھ پہلے نجی خلائی جہاز سپیس ایکس پر اس سال موسمِ خزاں میں خلائی سفر کے لیے روانہ ہوں گی۔امریکی ریاست ٹینیسی میں بچوں کے کینسر پر ریسرچ کے ہسپتال سینٹ جوڈ چلڈرن ہاسپٹل نے اعلان کیا کہ ہیلی آرسی نو اس ادارے کی سفیر بن کر خلا میں جائیں گی۔ 29 سالہ ہیلی اب تک کی سب سے کم عمر امریکی ہیں جو خلا کا سفر کریں گی۔انہوں نےبچپن میں کینسر جیسے موذی مرض کو شکست دی تھی۔ایک انٹرویو کے دوران ہیلی آرسی نو کا کہنا تھا کہ کینسر سے لڑائی نے انہیں خلائی سفر کے لیے تیار کیا۔ کینسر نے انہیں مضبوط بنایا اور شاید اس مرض نے انہیں سکھایا کہ غیر متوقع باتوں کی توقع رکھنی چاہیے۔آئزک مین کو امید ہے کہ وہ اس مشن سے، سینٹ جوڈ ہسپتال کے لیے دو سو ملین ڈالر کے عطیات اکھٹے کر لیں گے، جس میں سے نصف وہ اپنی جیب سے ادا کریں گے۔آئزک مین نے یکم فروری کو اپنے خلائی مشن کا اعلان کیا تھا، اور انہوں نے اپنے آپ کو خلائی جہاز کا کمانڈر مقرر کیا ہے۔ سپیس ایکس نامی خلائی جہاز میں چار نشستیں ہیں، جن میں سے دو انہوں نے سینٹ جوڈ ہسپتال کو دے دی ہیں۔انہیں اپنے عملے کے مزید دو ارکان کی تلاش ہے، جس کا اعلان وہ مارچ میں کریں گے۔سپیس ایکس اکتوبر میں امریکی خلائی ادارے ناسا کے کینیڈی سپیس سینٹر سے پرواز بھرے گا، اور ان کا جہاز دو سے چار دن تک زمین کے مدار میں گردش کرے گا۔ تاہم انہوں نے اس مشن کے اخراجات کی تفصیلات ظاہر نہیں کیں۔

بلاول بھٹو سے قائم علی شاہ کی ملاقات‘ ملکی سیاسی صورتحال پر تبادلہ خیال