11جماعتیں ملکر بھی سینٹ الیکشن میں پی ٹی آئی کی کامیابی نہیں روک سکتیں: فردوس عاشق
لاہور (نیوز رپورٹر) معاون خصوصی وزیراعلیٰ پنجاب ڈاکٹر فردوس عاشق اعوان نے پی ٹی آئی کے وفد سے گفتگو میں کہا ہے کہ ڈسکہ گزشتہ چار دہائیوں سے لاقانونیت، غنڈہ گردی اور منشیات کاسومنات بنا ہوا تھا جسے ڈسکہ کے عوام نے بہادری، جرأت اور دانش مندی سے ووٹ کی طاقت سے بالآخر توڑ ڈالا ہے اور عمران خان کی قیادت اور پی ٹی آئی کے امیدوار علی اسجد ملہی پر بھر پور اعتماد کا اظہار کیا ہے۔ جن لوگوں نے قانون کو ہاتھ میں لے کر بے گناہ انسانی جانوں سے کھیلا ہے وہ کن کے ساتھ کھڑے ہیں اور کون انہیں سپورٹ کر رہا ہے یہ کیمرے کی آنکھ نے میڈیا کے ذریعے عوام کو دکھا دیا ہے۔ ڈسکہ کے عوام نے مریم نواز کی میجر سرجری کر دی ہے۔ باقی رہا ان کے تھائیراڈ کا مسئلہ تو ڈاکٹر یاسمین راشد بتا چکی ہیں کہ ان کے محکمے میں ہر طرح کی سرجری کی سہولت موجود ہے اور انہوں نے مریم کو آفر بھی کی ہے۔ میں بھی مریم کو آفر کرتی ہوں کہ اگر سرجری کیلئے پینل آف ڈاکٹرز کی ضرورت ہے تو اپنی تر مصروفیات کے باوجود میں ایک سرجن ڈاکٹر ہونے کی حیثیت دستیاب ہوں۔ کیونکہ میں کسی میڈیکل کالج کی بھگوڑی نہیں بلکہ ایک کوالیفائیڈ سرجن ہوں۔ سینٹ کے الیکشن میں ایسا کچھ نہیں ہونے جارہا جس کا اپوزیشن نے واویلا مچا رکھا ہے۔ گیارہ جماعتیں مل کر بھی پی ٹی آئی اور اس کے اتحادیو ں کو کامیابی سے نہیں روک سکتیں۔ ہم انہیں سینٹ الیکشن میں سرپرائز دیں گے اور مریم کو سیاسی گرو کی نااہلی کے بعد مزید صدمے کیلئے تیار رہنا چاہیے۔
