گورنر پنجاب سے نیوی کے اسٹیشن کمانڈر لاہور کی ملاقات
گورنر پنجاب چوہدری محمد سرور سے پاکستان نیوی کے اسٹیشن کمانڈر لاہور کموڈور نعمت اللہ نے گورنر ہائو س میں ملاقات کیجس میں اہم امور پر تبادلہ خیال کیا گیا ۔ اس موقع پر گورنر پنجاب چوہدری محمدسرورنے کہا کہ پاکستان نیوی خطے میں ایک مضبوط بحری قوت کے طور پر پہچانی جاتی ہے، پاک بحریہ نے ہمیشہ منہ توڑ جواب دے کر بھارت کا غرور خاک میں ملایاہے، پاک بحریہ کی پیشہ ورانہ مہارت 22کروڑ پاکستانیوں کیلئے قابل فخر ہے۔گور نر پنجاب نے کہا کہ پاک بحریہ کے شہدا اور غازیوں کی قربانیوں کو قوم سلام پیش کرتی ہے۔ پاک بحریہ عالمی بحری افواج کے ساتھ مل کر عالمی پانیوں میں امن و استحکام یقینی بنا رہی ہے۔نیوی اسٹیشن کمانڈر کموڈور نعمت اللہ نے کہا کہ پاک بحریہ کے افسر و جوان خون کے آخری قطرے تک مادر وطن کا دفاع کرنے کیلئے پر عزم ہیں۔ سی پیک کے تناظر میں پاکستان نیوی اپنی بڑھتی ہوئی ذمہ داریوں میں اہم کردار نبھانے کیلئے تیار ہے۔
